SUN微博：黐筋網記：怪獸都識打要害

細細個睇電視播鹹蛋超人，總覺得鹹蛋超人好有型，為咗保衞人類，不惜以一敵眾多怪獸，仲要成日畀啲隊友誤會，以為佢臨陣退縮（其實佢去咗變身保衞地球）。所以，當鹹蛋超人唔夠怪獸打嗰陣，又或者心口盞燈響緊嘅時候，坐喺電視機前嘅小編都會好擔心佢嘅安危。

近日，小編喺網上見到幅鹹蛋超人被兩隻怪獸夾攻嘅相，只見其中一隻從後挾着鹹蛋超人，另一隻竟以手「猛攻」鹹蛋超人要害。

此情此景，又勾起童年睇鹹蛋超人嘅回憶，可惜以往嘅心境已經不復存在，只覺得佢霸氣盡失。而且望住張相嘅時候，小編心就不禁喺度諗，其實節目製作者都非常認真，怪獸嘅設定亦都非常人性化，知道要攻擊，就要攻人要害，難怪次次鹹蛋超人心中盞燈都會響喇，咁聰明嘅怪獸，三分鐘邊度會打得贏呀？