政情：沈祖堯掃劍橋靚呔
早前見到中文大學校長沈祖堯戴咗條色澤鮮艷、圖案媲美幅畫嘅Fox & Chave靚呔，原來條呔係喺劍橋大學Fitzwilliam博物館買嘅。佢啱啱去完牛津同劍橋兩間大學考察，想參考人哋嘅做法，以便將中大文物博物館搞得更出色，而喺考察期間，佢一眼就畀花花靚呔吸引，讚條呔圖案好靚，價錢又唔貴，大約二十英鎊，折算港紙唔使三百蚊，所以一口氣買咗兩條。
佢勁讚兩間大學博物館做得好好，幾乎日日有中小學生去參觀或上堂，仲有工作坊畀小朋友動手做。佢話中大博物館有好多中國藝術品及古董，收藏好豐富，佢認為培養下一代對中國文化嘅興趣，應該由細路哥開始，所以佢諗住將博物館執拾吓，再請番幾個人講解介紹，就可以畀小朋友去博物館體驗中國文化。
沈祖堯戴住嘅靚呔係喺劍橋大學Fitzwilliam博物館買嘅。