政情：搞搞政：環評廢噏波波狂省煲呔曾

有個婆婆申請法援，就港珠澳大橋嘅環評報告提出司法覆核贏咗，工程即刻叫停，煲呔曾上星期就喺立法會答問大會度發爛渣。做咗四年幾法律援助服務局主席嘅立法會會計界議員「波波」陳茂波尋日話，香港勝在有言論自由同司法獨立，覺得煲呔曾冇必要喺答問大會講啲咁嘅嘢。

今次港珠澳大橋案係法援幫拖，波波話覺得煲呔曾咁講係施壓，但佢話所有法援申請都係由法律援助署審批，法援局唔會干預，法援署處理每宗申請尤其係同政府有關嘅司法覆核都會小心處理，家陣政府決定就港珠澳大橋案上訴，法援署都會繼續資助申請人，但萬一申請人喺上訴時輸咗，就要視乎判詞同有幾大勝算，先再決定係咪資助申請人上訴至終審法院嘞，因為打到上去要用嘅錢起碼以百萬元計。

佢又話咁多年嚟法援署處理嘅個案大約有六成係勝訴可以攞番錢，但法援局都諗緊啲節流方案，希望承接法援民事案嘅律師可以同刑事案嘅律師一樣，收平啲律師費喎！