政情：姚君達全家撐場賀掛牌

人氣新股米蘭站尋日氣勢如虹，主席姚君達仲一家大細出席掛牌儀式，佢着咗件「飲衫」出場，喺人群之中好耀眼，佢就四萬咁口周圍招呼嘉賓，而公司就搵人做咗個手袋形蛋糕送畀港交所，即場請所有嘉賓食晒個蛋糕，等嘉賓唔使靜係食蝦餃燒賣「咁dry」。

姚君達細佬姚君偉同細妹姚秀慧依家都喺米蘭站打工，係公司嘅高層之一，三兄妹當然出席上市儀式，難得姚爸爸同姚媽媽都一齊見證呢個重要嘅歷史時刻，姚媽媽仲讚姚君達自細就好乖，唔使佢操心。記者見到姚媽媽攞住個名牌手袋周圍去招呼嘉賓，睇嚟姚君達應該送咗唔少名牌手袋畀老媽子。

港交所主席阿Ron夏佳理同行政總裁李小加都有嚟，真係高度重視佢哋，以往只有大型集資新股先會蒲頭。阿Ron成日話要吸引外國企業來港上市，雖然米蘭站唔係來自外國嘅國際名牌，但個名有「米蘭」兩個字，又賣外國牌子，都算半間外國公司啩。