政情：港大淪阿二 徐立之酸爆

香港大學校長徐立之已經做咗九年校長，原本今年開埋一百周年大派對，明年就可以圓滿完成兩個任期講bye bye，點知臨尾老貓燒鬚。一向係亞洲最佳學府嘅港大，日前被只得兩年歷史嘅《QS亞洲大學排名》評為老二，僅以零點二分之差輸畀科技大學，認真為百年學府贈興。

建校二十年嘅科大跑贏百年港大旋即成為城中熱話，徐立之被追問感受時，初初仲好有風度咁恭賀科大，跟住就話排名只係數字遊戲，做研究最重要係講實用同埋對社會嘅貢獻。

呻政府孤寒靠害

嘩！大學唔重視排名真係冇人信，一聽就知徐校長幾酸溜溜。佢話鋒一轉，話佢一直同政府反映大學嘅資源有限，但係政府就認為大學財政「水浸」。其實徐校長先後多次鬧政府喺科研嘅投資唔夠，今次又咁講，唔通責怪政府唔肯「放水」，搞到港大唔夠經費做研究，先至輸咗畀科大？

徐立之係國際知名嘅遺傳學家同埋人類基因研究權威，喺醫療科學上早已取得卓越成就，佢出任港大校長之後，出色嘅表現備受肯定，其中就包括籌款能力。同其他大學相比，港大有百年校譽做招牌，籌款嘅號召力已高過同行多多聲。之不過，短視嘅政府一向吝於為教育做出承擔，寧願將幾百億元財政收入派街，的確令人火滾。

其實，今次畀分嘅機構喺○九年先至首次發表亞洲大學排名榜，過去兩年都係港大居冠，今年就以些微分數屈居第二，若果徐校長咁介意嘅話，咪針對今次失分之處做多啲嘢囉！