天生淫賤難自棄 淫媒臭罌出臭草

天生淫賤難自棄。壹淫媒似足一個大瘟神，四圍散播瘟疫，去到邊禍害到邊，香港已經畀佢搞到烏煙瘴氣，依家連寶島台灣亦慘告淪陷，搵唔到一片淨土。

呢，根據台北市衞生局統計，二○○五年到依家，台灣爛果報一直係刊登涉違規食品、藥物、化妝品廣告嘅報紙冠軍，從○五年嘅一百一十五件，逐年遞增至○九年嘅七百三十七件，平均每日就有兩件廣告違規；舊年雖然少咗啲，仍然有四百五十四件，佔所有報紙違規廣告超過一半。而台灣《壹週刊》亦淫賤不甘後人，同樣係刊登違規廣告嘅雜誌冠軍，前年有一百九十七件，舊年有二百六十件。

正所謂臭罌出臭草，爛果報同《壹週刊》就好似壹淫媒旗下嘅兩棵臭草、毒草，污染台灣傳媒，毒害台灣社會，搞到神憎鬼厭，人人喊打。正如當地新聞及社會團體話齋，壹淫媒刊登不實廣告，唔止違反新聞倫理原則，亦形成對民眾欺騙嘅共犯行為，甚至可能危害民眾身體健康，非常不道德，當局除咗公布不實廣告，更加應該採取重罰，以維護民眾權益。

係咯，對付誨淫誨盜、害人害物嘅淫媒，絕對唔可以姑息㗎。就好似前年咁吖，台灣爛果報推出所謂「動新聞」，話就話係乜嘢虛擬動畫，查實係掛羊頭賣狗肉，利用電腦技術販賣色情暴力，卒之激起台灣社會公憤，幾十個民間組織浩浩蕩蕩操去壹淫媒抗議。台北市政府順應民意，果斷向淫媒宣戰，台北市長郝龍斌三日之內以雷霆萬鈞之勢使出五招痛擊，包括連續施以巨額罰款，並禁止學校訂閱爛果報。

嗱，呢啲咪叫做正氣凜然囉，呢啲咪叫做大快人心囉。話時話，壹淫媒販賣色情暴力，荼毒青少年，固然應該嚴懲，而刊登不實廣告，害人害物，當然亦唔可以放過喇，咁先至係有法必依、除惡務盡吖嘛。睇番香港，妖孽當道，正邪不分，簡直不知所謂。咁多年來，壹淫媒違反《淫褻及不雅物品管制條例》百幾次，次次都係輕判了事，罰款永遠一萬幾千雞碎咁多。最離譜嘅係，最近壹淫媒先後兩次網上宣淫，畀淫審處評為二類不雅，但影視處居然當冇事發生，連檢控都慳番。唉，冇辦法喇，淫賤黎有港英餘孽包庇，好似揸住免死金牌，仲唔愈淫賤愈快樂咩！

台灣當局嚴打淫媒，違法必究，而香港政府就百擒百縱，姑息養奸，唔通呢啲就係回歸同未回歸嘅分別？照咁睇，淫賤黎應該求神拜佛望兩岸早日統一先至係，因為到時咯喎，淫賤黎喺台灣同香港都可以享受百擒百縱嘅優惠待遇，想唔快樂都幾難喇，叮！

始終都係毛伯伯講得啱，「借問瘟君欲何往，紙船明燭照天燒」，對付瘟神嘅最好辦法就係紙船明燭照天燒！