政情：怪醫嚟自醫生世家
政情：怪醫嚟自醫生世家
香港好多醫生世家。尋日立法會醫學界代表梁家騮醫生（怪醫）同哥哥梁家騏醫生合資嘅診所開幕，大家先知道，梁家騮亦來自醫生世家，家族出咗四個醫生，除咗骨科、外科外，仲有以前喺台灣執業睇內科嘅三哥梁家驊，仲有依家喺屯門醫院接受外科專科訓練嘅姪女梁裕穎。尋日梁氏兄弟診所有喜事，除咗最細嘅六弟嚟唔到外，其餘兄弟到齊晒。
做咗私家醫生多年嘅哥哥亦就晒第一次個人執業嘅細佬，除咗醫生房畀怪醫揀先之外，連裝修都畀怪醫話事。怪醫仲搵人上門睇風水，話兩間房都好好，佢嗰間就旺人緣，怪不得醫管局主席胡定旭、新任醫管局CEO梁栢賢、食物及衞生局正副局長、醫學會會長蔡堅、副會長陳以誠等醫學界重量級人物都抽空出席，連匯賢智庫立法會議員葉劉淑儀、商務及經濟發展局副局長蘇錦樑、運輸及房屋局副局長邱誠武等都有賀佢。
梁家騮兩兄弟自立門戶開診所，一家齊心切燒豬。左起：梁家騏太太、四哥梁家騏、梁家驊太太、大哥梁家駒、梁家駿太太、梁家騮、二哥梁家駿、三哥梁家驊。
