政情：孫公拆彈慢辣慶張文光

直資學校帳目及管治被揭一團糟後，立法會政府帳目委員會已火速展開聆訊，教育局局長孫明揚日前慨嘆政府「冇牙力」，令好多家長同市民都好詫異。本身係教育中人嘅立法會議員張文光尋日出席個電台節目時，就澄清政府唔係冇牙力，而係孫公同啲手下拆彈太慢。佢仲話，早已經提過孫公要睇緊啲直資學校，但教育局就慢動作過審計署，依家只有叫啲違例學校向家長回水、減學費先可以稍為平息眾怒。

阿松時代亦懶監察

直資學校問題曝光之後，張文雖然意見多多，不過佢唔係帳委會成員，冇得參與帳委會嘅正式聆訊，尋日出席電台節目，終於可以喺直資議題上大批特批，仲由八十年代講起直資嘅起源。

佢話，最初港府只係想幫助一啲左派學校，開始津貼一啲私校，到前財爺梁錦松年代大力提倡優質私校，直資學校亦愈嚟愈多，不過，政府嘅規管同監察似乎並冇同步增加。即使早幾年相繼揭發有英基同臻美學校出問題，但警鐘響起後，政府只係鐵腕對兩間學校採取行動，事後一樣掉以輕心。

臻美出事已提警告

張文好唔客氣咁話，臻美出事之後，佢曾經向孫公提過，直資學校係一塊問題重重嘅教育王國，政府監管唔夠，促請政府快啲徹查，點知教育局都係冇行動，張文有啲意興闌珊話，孫公有名係政府嘅拆彈高手，或者啲高手要一個一個炸彈咁拆，否則一次郁十幾個炸彈會畀炸死，所以先拖到家吓，畀審計署搶先一着啩。

點都好，孫公拆彈唔夠快，自己都周身傷。直資學校單嘢爆咗後，佢一邊要應付立法會政府帳目委員會嘅追究，一邊要拿拿聲同學校講數，仲要繼續應付縮班殺校嘅反對聲音，真係老貓燒鬚囉。