海陸打孖嚟上樓食蠔再鋸扒

想食生蠔，銅鑼灣有很多選擇，但一般蠔吧偏重海鮮，少有像區內著名食廈澳門逸園中心的新成員「Edo & Bibo Oyster and Steak House」般，將牛扒、生蠔「撮合」，每日供應約10款環球靚蠔之餘，客人還可鋸靚扒，草飼、穀飼，就連36安士巨型牛扒亦俱備，各蠔迷、牛迷請各就各位，上樓開餐去吧！

或許仍被陰影籠罩，令本地的日本食肆仍前途未明，有的離場，有的轉營，像今日介紹的這間餐廳，前身是主打沖繩菜的「天喜磯味酒處」，跟同一食廈的日本串燒店「備長」是姊妹店。

生蠔款式罕見

「舊的不去，新的不來。」取名Edo & Bibo的蠔吧連扒房，在拉丁語有食與飲的意思，全店重新裝修，換個西式造型，以牆上的一幅粉筆牛圖最搶眼，除了標示各部位，深色的石屎牆跟繽紛的粉筆字，也成了對比。店主Paul表示，布置帶濃濃的美式風情，像西部牛仔片會見到的彈弓木門、綴以窩釘的皮椅子，連同掛起的殘舊用具擺設等，營造出輕鬆、型格的氣氛。

由昔日刺身吧變身的蠔吧，蠔迷可揀坐吧位，柯打每日運來、約10款的靚蠔，來自澳洲、新西蘭、法國及加拿大等海域，當中不乏像Pinky、Nelia及St.Vaast等罕見貨色，吧枱還有Cherry Stone鮮蜆、淡水小龍蝦及其他海鮮等，睇見已很興奮。

低溫慢煮靚扒

生蠔以外，另一主打是陸上的各式靚扒，像新貴黑毛豬，美國的、西班牙的都用上；食慣羊架，或可改試味道甚濃的澳洲羊T骨扒，將嫩滑的羊柳及濃香羊西冷兼收。焦點仍落在牛扒身上，餐牌只嚴選了4款，有適合「獨食」的Prime級的Striploin及免翁牛柳，想大夥兒分享的，就要揀重達36安士的T骨扒及形如斧頭的連骨肉眼Tomahawk。大廚表示所有扒類，都會以高達攝氏4、5百度的火山石爐先煎封表面，鎖住肉汁、增添焦香味，再給點耐性來個低溫慢煮，像36安士的巨扒便至少煮45分鐘，少點心機耐性都不行，食到外皮脆、內裏嫩滑多汁，便知值得等。這裏還有幾款「今日精選」，像作頭盤的生牛肉薄切，改用矜貴罕有的A5級松坂和牛，入口即溶，牛迷們一定滿意。

透心涼龍眼冰

天氣熱得人發瘋，不吃雪糕、雪條，分分鐘會溶掉。一直知道將軍澳的「聰嫂甜品」很馳名，但礙於「唔就腳」，一直沒的起心肝去幫襯，直至去年店子於銅鑼灣開分店就方便得多，但晚上常見人龍，要花點時間等位。店子最具特色的，該是不同味道的沙冰，全部用新鮮生果打成，味道濃郁又夠冰凍，吃一口，透心涼，其最受歡迎的王牌榴槤冰更是無人不識，可惜我不嗜榴槤，所以每次到來都必點龍眼冰，龍眼肉加入香滑椰汁打成冰，既香又甜，每啖都有粒粒果肉和椰果，消暑解渴，諗起都想食。

超腍身牛肋肉

雖然明知不太健康，但我卻愛重口味，唔濃唔香的通通不是我杯茶。直到早前與酒店公關吃飯，在海景軒吃了一道「梨香牛肋肉」，軟腍肉質基本上不用咀嚼已可嚥下，但濃郁肉香卻仍留在齒頰間，以原個雪梨成盛器的賣相，還非常精緻。此外，大廚梁師傅還精心配搭出很豐富的菜單，如魚湯稻庭烏冬、家鄉煎茶粿等，前者清甜滑溜，後者香口惹味，各有風味，不過說到底，我還是最愛腍中帶絲絲咬口的牛肋肉，那種口感與味道，至今還在回味中！

學利魚蛋看門口

兒時，跟家姐都有個「宏願」，就係開一間魚蛋檔，因為我哋實在太愛食魚蛋，由街邊的咖喱魚蛋到潮州手打魚蛋都極愛吃，其中在元朗起家的學利魚蛋，是我中學時期，跟同學無論打邊爐抑或BBQ的必備材料，而且次次都爭崩頭，其外貌有別於一般圓形、細細粒的魚蛋，欖形外貌是其嘜頭也。據說店方用上新鮮黃鱔打魚蛋，質感爽彈得來又有魚肉鮮甜香，就算白烚嚟食都夠晒正，我仲會不時買定一磅放喺雪櫃看門口，寫稿至深宵覺得肚餓時，煮個即食麵再加幾粒落去，即時慰藉心靈，寫稿都有感情啲。