Fundman睇市：金蝶挑戰2元非難事

踏入一三年僅四個交易日，純看指數，除二號首日開市狂升655點外，港股有點膠着狀態，尋日恒指又再悶足全日，不足百五點波幅，收市跌1點，報23,329點，但實際情況是，唔少三、四、五線股炒落後，52隻股票升幅超過一成，比上周五大增六成七。

傳統藍籌抖氣，炒到仙股及垃圾股，往往是市況即將見頂先兆，事實世界三大發鈔機器，歐美日央行傾向短期維持量寬規模，即使美國有聯儲委員認為量寬應在一三年結束，但由聯邦基金利率期貨近幾日的變化所見，賭美元息口年終高於0至0.25厘的賓架，僅佔6%，恐怕狼來了故事仲要多講幾遍，個市先至會有反應。

去年投行一面倒唱淡，較樂觀的只係估計港股持平，結果恒指輕鬆交出全年22%升幅，而八成以上港股基金回報跑輸大市，管錢的自然尷尬，急於追落後尋找表現也是人之常情。港股投資氣氛近兩三個月正經歷一百八十度的轉變，這趨勢一成，要逆轉也需要時間，至少要消耗基金手上的閒置購買力，幾時講唔埋，有朝一日看官見到港股成交由超過千億的高峰回落，指數開始停滯不前，屆時就真係要開始小心。

財險（02328）母公司人保（01339），尋日以上市新高4.24元收，足足比招股價3.48元累升21.8%，史提芬大嘆走雞之餘，留意到同期財險升幅原來只得14%。

財險極具追漲空間

人保七成收入來自財險，另外三成來自壽險。目前，人保在內地壽險市場佔有率約8至9%，與平保（02318）及國壽（02628）相比較遜色。毫無疑問，買人保目的是其產險。儘管內地保監去年三月發布的《關於機動車商業保險費用率及保單條款指引》，估計今年落實，變相增加市場競爭，但財險本身擁有較大的客戶基礎，加上積累龐大數據庫及差異化產品，其他財險公司要短期挑戰一哥地位殊不容易，筆者奇怪基金想投資產險，怎會繞過財險而揀人保，若非係後者上市時基金分唔夠貨，否則財險短期內追補升幅的機會唔細。

今浪資訊科技股金蝶（00268）都算大落後，昨日在四個月以來最大成交配合下，股價抽升0.11元報1.67元，但仍然比去年十月高位1.72元低。因為裁員及關掉一些低效益部門的一次過費用影響，金蝶一二年業績曳幾乎是市場共識，綜合大行預測，估計蝕1.25億人民幣。然而，股票賭嘅係未來而唔係過去，近幾個月，內地PMI回到50擴張線樓上，有利刺激內地企業提高一三年資訊科技開支預算，金蝶今年業績，應可順利出現大逆轉，大行估賺1.45億人民幣，重返一一年水平。

睇番金蝶股價自去年九月中，主要在1.4至1.7元之間浮沉，尋日見大行買盤不絕，成交明顯突破，走勢上，短期挑戰2元應該唔係難事。