Fundman睇市：大昌行 爆發新升浪

放假期間A股狂升，滿以為港股復市能夠照辦煮碗的，點知恒指復市，撇除開市頭段，全日波幅不足50點，靠滙控（00005）、和黃（00013）及三隻內銀撐場，收報22,619點，升78點，主板成交417億，全日市計係三個月以來最少。唔經唔覺，大市已經進入去年22,500至24,000點的後海嘯巨型蟹貨區，後市係龍係蛇？睇怕都要等結算後，大孖沙陸續歸位，先會見到真章。

安倍晉三出任日本首相，對振興經濟反通縮的強硬姿態，深得國民支持，近期日股強勢畢呈，圓匯卻跌至二十個月新低，多少反映出金融市場傾向預期安倍向日本央行施壓，未來推行量寬的規模及力度，好可能比美國聯儲局主席伯南克有過之無不及，一些能受惠於弱勢圓匯的公司，短期內不妨加倍注意。筆者一號心水股，係代理及經營內地汽車4S店的大昌行（01828），尋日股價升穿十一月初高位8.21元，旗型整固完成爆發第二輪升浪，今浪量度升幅，保守計應該可見8.9至9元關。

睇見統一（00220）及康師傅（00322）由月初高位級級落，大致估到為數不少的大孖沙，選擇由高增長高估值股票，轉投價殘的周期性股票，筆者第一時間想起已經連蝕四季，今年股價升得4.7%跑輸晒大市的中鋁（02600）。

中鋁現價值博率高

事實在過去二十個季度裏面，中鋁業績見紅就有十一季，業績完全受工業需求周期影響。中鋁過去四季皆蝕，時間上已超越金融海嘯後，○八年第四季至○九年第二季的三季見紅，累積蝕50.6億元（人民幣．下同），同當年的60.5億元不相仲伯，較大的不同，係今次中央講明唔會有4萬億基建救經濟，中鋁仲要捱幾耐？真係誰也說不準。

基本因素差，唔代表唔可以諗博反彈，尤其內地經濟開始走出谷底，氧化鋁價格及需求回升，未必令面對嚴重產能過剩的中鋁業績一百八十度逆轉，但對估值處於歷史低位的中鋁，並非絕無可能。

最近中鋁市帳率由九月低位0.6倍樓下，回升至0.69倍。比○八年因4萬億計劃，狂升至2.2倍，即使今次無咁瘋狂，但若中鋁回歸到較接近市帳率歷史中位1.77倍水平，現水平入市，中線風險有限，值博率卻頗高。