Fundman睇市：指數基金輕鬆取勝

上星期五港股早市因為美國眾議院的B計劃押後表決急挫，好友一個唔該，藉消息鎖定手上既得利潤，恒指跌153點，收報22,506點。臨近年尾，又到計計一年得失之時，唔經唔覺，今年港股由18,434點，去到上星期五收市的22,506點，累積兩成二升幅，假如讀者投資組合，今年有接近升幅，真要恭喜閣下！因為你們今年比近八成基金經理嘅回報更加理想。周末，史提芬同基金朋友傾開，今年芬佬跑輸大市情況，比過往幾年更嚴重，有一成至一成半回報，已經要開香檳。

芬佬大多數的解釋，例如A股「彈得太遲」，使他們眼白白睇住九月H股已開始掉頭回升，也未敢放膽入市；亦有云市場升勢太集中的在個別板塊，像本地地產、內房、頁岩氣等，傳統上要做到分散注碼，基金不能高度集中的「原罪」，令他們吃大虧等等。

史提芬認為更大的理由，係唔少基金經歷金融海嘯後的驚濤駭浪，食驚風散食到飽，唔少追求絕對回報基金，遲遲未番到water mark（基金單位歷史高位）樓上，惟有抱住戰戰兢兢嘅心態，少做少錯，面對第四季這類大家摸住石頭過河的轉角市，miss的機會更大。

唔想自己落手落腳揀股票，又怕所託非人，最低成本方法仲係揀市場指數基金（ETF），好似盈富基金（02800）、南方A50（02822），安碩A50（02823）及華夏滬深三百（03188）這一類，至少年結時你知道，你的回報會勝過八成跑輸指數的基金投資者。

中興最壞時刻已過

今年最最最落後的，要數電訊設備股，中興通訊（00763）第三季勁蝕19.45億元人民幣，令首三季累積盈轉虧，蝕17億元，管理層承諾大刀闊斧透過裁員削減開支、縮減毛利率低的項目、重塑產品線，分析員預期中興最壞時刻已過，明年業績反彈可期（由今年3至5億，回復至20億元人民幣樓上）。

近期有報告估計，隨着內地三大電訊商3G滲透率開始達到規模效益，4G設備的投入可能提早啟動，令捱緊打的設備供應商可以提早度過寒冬，中興股價九月初短暫跌穿10元後，很快就重返11.5至13.5元的橫行區，相信未來六至十二個月，向上突破的機會遠高於再試低位，值博率其實頗高。