Fundman睇市：撈內房股首選雅居樂

經過兩輪長期再融資操作（LTRO），投資者開始懷疑歐豬國能否完成削赤計劃，西班牙早前拍債，市場反應比去年底冷淡得多，十年債息升穿6厘，創今年新高。

無疑，歐豬融資成本一旦繼續上升，去到6至7厘的爆煲關口，而今年發債目標仲有過半未達成，「釘冚釘」還息都唔講得笑，歐央行一定唔會坐視不理，LTRO、QE等一堆字母，一定會再同市場見面。

不過，歐股自去年八、九月以來反彈幅度唔細，展望下半年，獲援助歐豬開始要勒緊褲頭減赤，經濟有差無好大致可以預期，股市先來個調整唔出奇。

對比前晚歐股普遍超過2%的跌幅，尋日港股跌得溫和，跌215點或者1%，事關恒指同國企指數比歐股足足早成個月見頂，估計今浪港股跌穿兩萬點機會好大，但去到19,000至19,500點，已經相當足夠。

中資股弱勢難扭轉

A股的確是令人摸不着頭腦的股市，經常人跌佢升，賓架界流傳幾個好消息支持股市，包括可能在十八大前，加速「十二五」中的基建項目，另外，三月份內地銀行新增貸款數字，可能比預期的7,500億至8,000億人民幣多一截，去到9,000億甚至1萬億人民幣，結果滬綜指先跌後回升，收報2,309點，升3點，帶動午後港股一度跌幅收窄。

中線而言，A股跌到單位數字市盈率的歷史新低，事出必有因，投資者對內地經濟增長同上市公司盈利，都抱有極大懷疑。直到昨日，八成上市A股出了第四季度成績表，情況的確令人有少少擔心，睇番第四季，平均營業額增長12%，純利倒退8%，純利率比前一季收窄2.1個百分點至7.5%，如果剔除金融公司，營業額依舊升12%，但純利平均倒退達24%，純利率更去到慘淡的4%。相對一一年已經唔算標青的全年數字，平均盈利增長24%，撇除金融股後純利增長收窄到1%，A股公司賺錢能力有急速惡化的趨勢。一葉知秋，香港上市的中資股近期弱過藥煲，審慎而言，或者市場至少要見到一季內地企業情況顯著改善，芬佬要錢唔要貨的情況才會逆轉。

早兩個月唔少內房股趁市旺發債，市場反應頗踴躍，雅居樂（03383）CB超額八倍，對比○八、○九年內房債幾乎無人問津，部分CB質到80甚至100厘都無人要的慘況，看來審慎的債券投資者，並無將政府調控、內房減價促銷的新聞放在眼內。

不過，房企管理層明白無形之手短期內唔會消失，一一年業績，普遍見積穀防饑嘅動作，本地上市內房股負債比率平均由六月底的64%回落到60%，其中較債重的綠城（03900）為1.62倍、富力（02777）98%、世房（00813）86%、恒大（03333）82%；至於心水股雅居樂、潤置（01109）及中國海外（00688），則分別為73%、68%和33%。財政上，中海或者真的保守了一點，故睇好內房股的話，筆者會繼續推介雅居樂及潤置。