Fundman睇市：平保值博率勝國壽

周一港股打破悶局之後，明顯逼到一班對後市舉棋未定的大孖沙加入追貨行列，尋日港股再升138點，報19,004點，亦係六月初指數跌穿100日線後，第一次成功突破100日線（目前在18,855點）阻力收市，主板成交升兩成一，去到573億元，反而沽空佔主板成交比例回到8.5%，可見部分淡友聞到燶味，入市沽空相對收斂，大市由周一即市低位18,302點起步計，保守估計挾1,000至1,500點，目標可以係19,302至19,802之間任何一點。

溫爺爺幾句說話，滬綜指兩日挾高5.6%，仲頂埋港股重返萬九樓上。但講到底，股市唔可能長期靠口噏噏長升長有，仲係要睇資金流向。睇番星期一，A股成交額比上星期五升近五成，尋日再升五成三，去到近1,700億元人民幣，內地股民由㩒實荷包，到慷慨解囊，或多或少同出口術有關，但更主要原因，是人行表明春節前唔會再賣央票，變相為市場放出4,000至8,000億元人民幣流動性，尋日隔夜上海同業拆息由4厘回落到3.69厘，照咁情況，春節前減存款準備金率機會細咗，因為人行早就已經開大條水喉，在節日前為股民帶來歡樂氣氛。

滬指挑戰2300阻力

滬綜指收報2,285點，升59點，仲可以再升幾多？睇番指數去年由3,000點樓上開始一浪低於一浪之旅，五月跌穿80日線，七月及十一月的反彈，都分別受制於這沒有太多人用作參考的平均線下，有人話2,300點鐵底跌穿今日變成阻力，但照M2回升加埋人行放水兩大利好條件，斷估反彈唔會咁短癮，目前80日線阻力在2,369點，今次到底係小彈抑或中期轉勢，能否升穿會係相當關鍵。香港人買唔到A股，惟有買ETF指數基金A50（02823）。不過，計算2823比A50指數資產淨值有近8%溢價，似乎值博率唔高。反而，去年因為A股不濟，投資收益可能水瓜打狗的內險股，會更啱股民胃口。

過去十二個月，滬綜指累跌18.1%，兩大內險巨頭國壽（02628）及平保（02318），股價分別跌39.2%及37.6%，比積弱的A股更差。多次講過，過去市場認為內險股投資必贏，願意付出溢價，今日接受現實，投資收入的額外獎賞蒸發上了太空，股價較指數跌幅更大，可以理解。

以市盈率計，相信最吸引會係國壽，一二年預期市盈率十三倍，比○八年海嘯低位的14.5倍仲低，可惜市佔率流失及近期保費收入增長低於同業，只怕估值下調是長期性，股價雖然平，但博反彈可能短期不及其他內險股。再睇一年的滬綜指與內險股之間的啤打系數（BETA，即兩者風險及波動性的關連，數字愈大，即股價比指數更波動及更大風險），國壽為1.29，財險（02328）1.57，平保1.86，似乎跌得殘的平保，會較國壽更值得嘗試博反彈，當然股民亦要考慮風險較高。

最後一提，是預期未來一年有較高保費增長的華保（01336），上月中上市市況不濟，結果百分百配給散戶，街外借孖展的全軍覆沒，第一日已輸掉一成孖展投降，因此股份也順利全數落入長線基金手上，現價同上市價28.5元仲有距離，博反彈較少蟹貨阻力，都可以加入考慮。