Kelly4D產檢：BB好健康！

潮媽天后陳慧琳（Kelly）走到懷胎五個月的心理關口，心情難免緊張，幸而昨日她到中環產檢照4D結構性超聲波，腹中塊肉健健康康，看見BB撐手撐腳，Kelly終於舒一口氣，雀躍高呼一聲：「BB好健康！」

天后Kelly走出傷痛再懷孕，並於去年11月把喜訊公告天下，宣布成功人工受孕，懷下龍胎！鑑於上次慘痛經歷，Kelly這胎特別小心，就連平日心愛的高跟鞋也索性棄穿，把工作逐一押後，一於專心安胎。

為保腹中的「小龍包」肥白健康，據知Kelly近日按時做產檢，昨日她在經理人鍾珍陪同下現身中環，相信是到「婦科聖手」何永超醫生診所做產檢。

下午四時，身穿Biker Jacky襯鬆身衫的Kelly，腳踏黑色Boot現身太子大廈，只見她薄施脂粉，掩住五個多月的大肚，全程四萬咁口，途人得見Kelly也不禁探頭一望。

據知，今次Kelly是到診所照結構性超聲波（俗稱照4D），照4D因為可以全方位見到腹中塊肉真身及健康狀況，加上整個過程歷時最少30分鐘至一小時，Kelly看到「小龍包」健健康康，難怪離開時笑得見牙唔見眼，見到記者上前拍照亦有求必應，有問必答。

拍片給老公欣賞

問到是否照4D超聲波？Kelly說：「係呀！仲可以拍片畀老公睇，見到BB撐手撐腳，真係好得意，仲有呀！BB好健康！真係好開心。醫生叫我輕鬆啲，唔好緊張！」她表示老公Alex平日會盡量抽時間陪她產檢，可是他昨日要返工，所以由鍾珍代勞，Kelly又說：「呢胎產檢真係多做咗，一切小心為上，平均兩、三個星期就做一次，BB依家開始踢我喇！真係好活潑囉！」她又謂蝦餃仔至今仍未知道將做哥哥，也不怕他會呷細佬醋。當離開上七人車時，她還主動跟記者講拜拜，心情明顯甚輕鬆。

停接Job押後出碟

記者致電Kelly助手，Kelly現已為「小龍包」減少工作，連原本產後推出的大碟亦要押後，其助手說：「醫生叫Kelly放鬆啲，因為佢個肚大，運氣會頂住，所以會生完先再錄碟，隻碟會延遲推出。依家Kelly會盡量唔接工作，除咗星期日（15日）《八星抱喜》首映會去，之後亦應承做演唱會嘉賓！」助手又表示Kelly沒有特別進補，現只是多飲高鈣奶及吃麥片、吞拿魚三文治及皮蛋瘦肉粥，重了十多磅。