Fundman睇市：地產股超賣博反彈

有股民用大奇迹日嚟形容昨日先急跌後勁升的破腳穿頭走勢，查實昨日早市外圍變動唔大，大戶趁未有太多基金積極參與，來個先殺好友，再挾淡友，操控即市上落的手法夠晒利落，恒指埋單收18,865點，升272點，沽空成交55.5億元，相當於大市總成交476.4億的11.6%，乃連續第三個交易日企在一成樓上，看來昨日的升市，更似是一次較具規模的挾淡倉行動。

講到神奇，最神奇仲係A股，將溫總深化新股發行制度的言論，演繹成提振股市的好消息，勁升62點，收2,225點，創近三個月最大單日升幅。查實，周日公布的M2廣義貨幣增長，同比升13.6%，高過市場估計，中央對「定點微調」口硬話唔放水，另一邊廂早就對信貸管理出彈弓手，人行表明春節前停發央票抽銀根，變相放水，瑞銀將人行全年新增貸款目標，由7.5萬億人仔調高到8萬億。

變相放水利好後市

儘管近期聽到唔少芬佬，怕中資公司第四季業績會令市場大失所望，四圍搵沽空對象，可是從中央一方面撳住樓市，一邊暗手放水的趨勢看來，今年首季情況未必好似淡友想像咁惡劣，炒第一季經濟因為水緊情況逆轉，開始見轉機都未定。

今日內地會公布三項經濟數據，包括十二月貿易盈餘，估計會由145.3億美元回落到88億美元；另外，十二月出口及入口增長，市場預測由上月的13.8%及22.1%，回落到13.4%及18%，A股能否再下一城，關鍵會係出口增長，能否超越市場估計。

展望一月份，市場焦點在「歐豬」拍債反應外，兩星期後的聯儲局會議，是否會為美息制訂長期息率預測，亦是重點。市場估計，今個月議息可能會拋出QE3引子，也會講明超低息會維持幾耐。若然聯儲局真係承諾低息兼且出到水浸股市樓市一招，資產價格有機會攀升，至少不能太淡。

身邊唔少需要置業的金融界朋友，去年開始對樓市睇得相當淡，然而低息及淨租金回報持續下，樓價卻是跌幅有限。近期，二手樓交投死寂，整體樓市卻持續量跌價不跌的情況，筆者認為，一來係懲罰性印花稅，二手樓業主賣樓換貨再被綁兩年的影響；其次係銀行收緊信貸，賣樓等於放棄舊有優厚按揭條款，換貨畀貴息，舊業主覺得唔划算。早前飯局，一位發展商銷售部高層直言，政府打擊炒樓政策，意想不到的副作用係反而幫了一手銷情，二手無價講，結果買家回流一手市場。

睇番龍頭新地（00016），股價由去年初140元，累積回落三成，遠多於樓市由去年六月高位至今的5%跌幅。過去十五年，新地在幾次樓市低潮，市帳率去到介乎0.5至0.7倍（九八年0.5倍、沙士0.6倍、○八海嘯0.7倍），去年十月，見0.75倍，不排除同賓架們睇樓市一樣，過分悲觀。

睇番昨日沽空佔成交比高見51.8%，是一年最多，上一次被淡友狂質正係十月初，股價見低位85.45元時，沽空比例去到四成，最後股價反彈返去110元，挾瓜唔少淡友，今次股價無十月咁大波動，但客觀條件超賣，加上人棄我取，筆者相信新地短期有機會來一個向上修正。