Reporter's Choice

絕非「阿二」的蛇王二

正值嚴寒，即時想到暖身暖胃的蛇羹，講蛇羹大多數人都推介中環蛇王芬或者深水埗蛇王協。這兩家店固然馳名，亦非浪得虛名，但小記心目中亦有一「蛇王」，就係雖叫阿二但絕非「阿二」的銅鑼灣蛇王二。我最愛其蛇羹足料得來更保持一定分量的湯汁，個人最怕一些蛇羹料太多湯汁太少，失去了平衡，須知湯與料的平衡對一碗蛇羹來說是十分重要的，太多只會像燴蛇肉。另外這裏的鴨膶腸及切雞燒味也很出名，膶腸皮脆、味道鮮甜；切雞是用蛇汁煨過，肉質嫩滑之餘還帶着一種特別的香味，這三寶絕對是冬天的補身佳品！

798紐約客

有時候跟朋友食餐便飯，並不喜歡到樓下茶餐廳或快餐店求其食，難得一敍當然要找一個食物美味、環境舒適及可以和朋友開懷暢談的地方。798 Unit & Co.絕對是個好去處，這家餐廳在香港有三間分店，由裝潢至Menu都非常紐約風。店內菜式用簡單的食材配以新穎的煮法炮製，再加上開放式廚房的熱鬧環境，置身其中猶如到了紐約市的布魯克林區。除了燒烤拼盤、意大利飯等主菜不能錯過的，還有這裏的甜品，特別是焗麵包布甸配海鹽雪糕，香濃的焦糖甜香加上陣陣鹽味，鹹、甜之間沒有衝突，反而令味道層次更豐富，每次友人都會讚我好介紹！

長駐人龍小酒窩

雖然廟街多好嘢食：煲仔飯、蠔餅、火鍋等街邊檔晚晚坐滿人，但在另一端的街尾，其實也有一間西式Fusion餐廳晚晚爆滿，門外更人龍長駐。我講的就是小酒窩餐廳，店名雖有點「娘」，但食過之後你只會對佢念念不忘。餐廳由南亞裔人士開設，除了印度菜，還有出色的意大利飯、羊架等，做各國菜式都有水準。其中每枱客人都必點招牌菜Four Seasons Pizza，菠菜是其餡料之一，很少薄餅會以新鮮蔬菜作餡料而又能保持水分，十分難得，另配有辣味燒雞、薯仔、蘑菇等食材，當中的Sour Cream的酸酸味道能平衡薄餅的膩，令Pizza更美味。能做到高級西餐廳的質素但價錢大眾化，就算店小，枱與枱之間較擠迫，亦應一試，尤其適合一班朋友圍威喂食餐熱鬧飯。