Fundman睇市：神威估值具吸引力

尋日港股走勢好鬼「假」，早市成交唔夠180億，但恒指就最多升過440點，去到20,975點，挾淡友味道高於一切。查實尋日支撐大市繼續上升的消息，主要得兩單，包括前晚美國機構ADP的就業調查，預示周五官方的非農職位數據未必太差，另一單就係祖國PMI數字連跌四個月之後，八月份反彈到50.9。不過，重點仲係恒指挾到20,970點樓上，意味街外熊證街貨會有過半被強制收回，結果昨日指數day high剛好係20,975點，大孖沙操控指數的準繩度，可見一斑。

本地窩輪市場對散戶唔公平，幾乎是路人皆見，唔好話牛熊證回收的價位，經常好似激光導航咁，畀大孖沙次次擊中之外，單係大市一旦波動，輪商居然有寬限時間，容許唔立即開價畀人沽貨，經已是荒天下之大謬。事實上，即使睇好睇淡，街外玩家由於限制能買不能沽空，注定只能單邊賭市場引伸波幅上升（implied volatility），波動市可以唔開價等於叫你綁住雙手同人打交一樣，偏偏監管者隻眼開隻眼閉，或者世界就係食得鹹魚抵得渴，明知輸多贏少，仲係有人前仆後繼。

數據差成淡友藉口

昨日港股嘅下半場，就好似山泥傾瀉一樣，一來大市已逼近第一個裂口位21,017點，技術反彈初步算完成，其次歐洲股市開市腳軟，令港股的反彈被秒殺。

歐元區公布的經濟數據，差得嚇死人，八月歐元區製造業採購經理指數（PMI）終值得49，是兩年來首次跌穿50水平，再睇其他歐洲國家數據，英國（非歐元國）及意大利PMI八月份分別創○九年六月及八月以來新低，去到49及47，法國亦由50.5跌至49.1，通通低於50，意味着製造業由擴張進入萎縮依家美國人正等緊總統奧巴馬下星期拋出新刺激經濟方案，但睇見幾個強國經濟數據差成咁，令人擔心歐債危機又會成為下一輪淡友的造市藉口。

筆者以為市場已充分消化發改委要求藥品價格下調的不利消息，但當中還是有令人意外的例子，基金股聯邦制藥（03933）上半年純利3.08億元，大跌36%，原因係國家控制原材料藥價對聯邦的衝擊比預期大，毛利收窄5%去到35.6%，對比大行預測的3.86億至5.85億元中期盈利，失算幅度都幾誇張，下半年業績如果倒退幅度一樣，市盈率十三倍，仍比歷史估值11.4倍高一成四，小心基金未洗完倉，博反彈睇嚟唔使心急。

專攻中、西注射藥的神威（02877），受藥品價格拖累，上半年毛利及純利率分別為66.6及41.8%，較去年同期的69.5及44.9%有所收縮，但銷售增長抵銷部分影響，而產品毛利較高，最終多賺4.2%，至4.38億元，股價升8.27%，可見目前市況，是希望愈大，壓力愈大，市場對神威期望不及聯邦，也影響業績後反應，以預期市盈率9.4倍，比歷史平均12.3倍折讓近兩成四，現價估值有一定的吸引力。

美林出報告睇19.5元，有點遙遠，但以歷史估值打個九折，去番十一倍左右，股價可見14元，作為今浪反彈目標應不為過。