Fundman睇市：靈寶有條件追落後

醜婦終須見家翁。美國六月份失業率又再拗腰回升，新增非農職位得1.8萬份，同支持經濟復甦所需要的每月創造20萬份新工，差十萬八千里遠，經濟向着雙底衰退的方向進發，聯儲局主席伯南克終於放風，話已經為經濟狀況轉差作準備，聯儲局會再推出刺激經濟措施，估唔到QE2壽終正寢才兩星期，QE3咁快又接住上。

作為市場參與者，筆者覺得有啲嘥料，道指前晚中段升過164點，最後升幅收窄到44點，收12,491點，一來美股氣氛未夠差，道指與海嘯後高位只係四、五百點距離，QE3對提振華爾街氣氛的作用唔大，影響力反而不及困擾着市場的歐債危機，以及八月二日美國國會就提高國債上限進行的表決。

基金乏買貨意欲

港股尋日收市前拗腰，恒指微升13點，收報21,940點，成交進一步比周二、三再縮水，得620億元。經歷周初要錢唔要貨的大逃亡，似乎基金經理未有意思咁快掉頭買嘢，前日盈喜急升的農行（01288），以及中信行（00998）沽空盤相當活躍，分別錄得6,471萬股及3,136萬股沽空，佔全日成交39.5%及44.9%。

希臘之後，意大利、愛爾蘭可能係下一輪歐債危機主角，但金融海嘯教曉大家乜嘢係「Too big to fail」，九成九最後係歐盟出來包底搞掂，至於下月初美國提升國債上限，更可肯定只是共和、民主兩黨為明年大選討價還價的一場馬騮戲，好難想像，全球最大債仔美國債務違約，世界會變成點？莫非我哋用番石頭、貝殼作為交易貨幣？

幾個金融危機背後，令人反思到底鈔票作為「保存購買力讓未來使用」的能力是否變質。歐美政府不斷提供流動性抵銷資產價格下瀉風險，刺激經濟，變相獎勵洗腳唔抹腳、債台高築的國家及企業，儲蓄成為受害者，貨幣購買力貶值，揸現金成為唯一輸家。

黃金再創歷史新高，尋日見過1,589美元，突破上半年高位1,577美元，睇番紐約期油、白銀分別距離四月做出的高位低14.5%和22.5%，反映今趟對鈔票不信任動議，黃金是眾望所歸。要解釋這現象，史提芬認為是因為後面兩種商品，市場價格較傾向工業及民生需求主導，故金融市場要逃避鈔票唔值錢的世代，黃金依然屬首選。

傳統上，黃金股走勢同黃金同步，比較奇怪的是國際金價今年二至五月，由1,300美元升至1,577美元，升幅接近兩成，但大部分黃金股股價卻原地踏步，或者歸咎於去年股價普遍升幅唔細，需要時間消化。最為落後的黃金股靈寶（03330），今年跌近兩成六，近期股價在4.6至5元之間鞏固，昨日終於按捺不住，在成交增加下出現突破，升0.3元，收報5.09元。

市盈率不足十倍

有cover靈寶的大行唔多，有分析員在四月份預測靈寶今年賺3.41億元人民幣，比去年升28%，預期市盈率9.9倍，對比紫金（02899）的12.6倍及招金（01818）的二十二倍，靈寶估值落後，趁住金市火光熊熊，如果靈寶重返十二倍的歷史平均市盈率，股價有條件睇6.1元。