Fundman睇市：茂業批股貨源入強手

上星期美股低收，惠譽又將希臘債務評級下調三檔，預咗港股無運行，但更致命係A股全日單邊向下，滬綜指重返一月底的低位，港股走勢相當一致，恒指最多跌508點，貼住低位收22,711，跌488點，不過成交只得約650億元，話基金唔計價洗倉又唔多似，明顯係市底承接力唔夠，人人抱住聽日買平過今日買的心態，結果呈現陰陰乾的市況。

中港股市跌得甘，同滙豐公布自己統計的中國PMI（製造業指數）預覽不無關係，出來數字只有51.1，係一○年七月以來最低，反映人行持續透過加存款準備金率及加息抽走銀根，通脹未成功抑壓，製造業經已首當其衝。

內地水緊，企業融資惟有透過其他途徑，近期大行協助上市中資企業發債發CB的消息特別多，買番隻內房股債券收7至8厘都唔錯。

記得○八年一役，唔少人估呢班中資銀行大債仔，至少三到四分一會因為資金周轉問題還唔到息，結果係點？緊急關頭，又係阿爺出手關照，最後香港上市的內房債券無一隻出事，今日內房股財力遠勝當年，大環境係經濟太好政府唔想樓市升得太急，內房股的償債能力唔差，幾間大型發展商的債券，筆者認為都幾吸引。再唔係，唔想麻煩等債券到期，查實人民幣結算房地產基金（REITs），好似早前上市的匯賢（87001）都係唔錯嘅選擇。

匯賢現價具吸引力

最近同一位內地房地產分析員傾開，話限購令重招的確令住宅交投大縮水，價格升幅放緩，然而商用物業價格與租金，仲係升個不停。睇番匯賢手上得北京東方廣場一個項目，好處係容易計數，以同區租金過去一年升三至四成計，未來兩年有五成租約重訂，可以估計租金收入上升空間唔細，以5.24元招股後匯賢一直潛水，近日見4.6元附近開始喘定，今日買等於較大戶入飛平一成一，預期息率接近5厘，計落都算吸引。

咁嘅市況要批股集資唔容易，批完唔死就更加值得留意，經驗告知這反映新貨源大多落入長線投資者手上，等市況好轉，這類股份可以睇高一線。講緊嘅係昨日完成批股的茂業（00848），剛先舊後新配售2.73億股，每股3.81元，集資淨額10.195億元，用作擴張店舖網絡，昨日股價曾經跌破批股價去到3.65元，但全日穩步上揚，收3.89元，比批股價高八格。

成功集資擴展業務

截至去年底止，集團在全國17個城市經營38間分店，總建築店面面積107萬平方米。去年營業額及純利分別升54.1%及22.7%，至21.97億元及5.77億元（人民幣．下同）。今年首季歸屬母公司所有者的淨利潤4,763萬，按年升10.8%，但扣除非經常性損失影響，實際升幅達41%。

去年開了五間分店，也收購了秦皇島渤海物流A股，以及山東省淄博糖酒站股份公司八成股權等，去年十月曾經發CB集資11.6億元，今次集資後，估計手頭現金會接近21億元，股東資金由39億增加至48.5億元，加強資本有利擴張。昨日不跌，證明基金對這內地百貨股仲係不離不棄，可考慮趁弱勢收集。