股海實戰：匯賢信託避險之選

到底「五窮」有幾窮，睇睇股市就知道。港股尋日一大支陰燭殺穿上周低位，恒指收報22,711點，跌488點，成交650億元，眨眼又落番橫行區底部，雖 然有所謂「吊頸都要抖抖氣」，短線出現技術反彈唔出奇，但上唔番23,000點都幾濕滯！

大戶心急沽貨套現，係近期股市積弱嘅底因。點解咁急沽貨？阿莊認為外圍利淡係其次，內地水緊先至係主因。聽聞除咗唔少內地商品炒家都急於套現外，事關內地通脹升溫，宏調措施效應正逐步展現，無論係炒家抑或商家，臨近年中都好等錢周轉，偏偏內銀受制於不斷上調嘅存款準備金率，愛莫能助，致使市場流通性緊張。近日市場盛傳，QDII面對較大嘅贖回壓力，並成為近日港股主要沽家之一。

A股亦唔好得去邊，尋日滬綜指插穿2,800點，跌幅2.9%，市場解讀跌市有多個版本，其中一個係國際板即將推出，意味市場多一個估值較合理嘅投資選擇，估值相對高嘅A股自然捱沽云云。難怪即使全國社保基金理事長出口術，話社保動用百億元入市，都無助提振A股表現。此外，阿莊相信，未來一個月將會有更多迹象顯示內地經濟增長放緩，營商環境轉差，「硬着陸」疑慮勢必進一步打擊投資者嘅持貨信心。

洗倉潮蔓延重磅股

回說港股，保利協鑫（03800）繼續食「彈散」，尋日再跌7.6%，收報4.01元。由於大戶沽貨心切，沽壓正蔓延至流通性較大嘅重磅股，大笨象（00005）失守80元和250日線，中移（00941）低見68.05元，14日RSI落到26，內銀股沽壓亦增加，建行（00939）及工行（01398）成交分別達到20億元及17億元，總之邊隻有買家就質邊隻，繼續係咁沽落去，最終輪到重創嘅內房股，商品股亦有機會再洗一轉，屆時呢兩類股跌幅可能會較大，避之則吉！

尋日阿莊坐喺缸邊觀戰所見，身邊笑臉唔多，笑嘅多半係新股王米蘭站（01150）嘅「中獎者」，事關首日掛牌高位做2.96元，收報2.77元，較招股價高65.8%，乃不折不扣嘅「跌市奇葩」，雖然每手「獎金」唔係特別多，但大跌市都有錢賺，就特別值得開心！

翻查資料，本月底到期嘅恒指牛證有廿多隻，收回價主要集中喺21,500至22,000點，但街貨唔算太多，反而五、六月期指嘅未平倉合約超過9萬張，期指先至係主要戰場。

反彈目標試前高位

大淡市避險股較受關注，上月底掛牌嘅匯賢（87001）本來冇咩人氣，尋日逆市上升，收報4.66元（人民幣．下同），成交增至7,133萬元。由於收益穩定，加上過去兩周股價喺4.5至4.6元水平營造出支持區，短線企穩10日線4.63元樓上，可吸引避險資金，反彈目標再試掛牌首日高位5.1元，穿4.45元止蝕。

戰報

中國七星購物

（00245）

Sammi上周五睇中嘅中國七星購物，尋日逆市升至0.101元高位，以推介日低位0.084元計，勁賺逾兩成。

中國信貸

（08207）

史提芬本月十三日推介嘅中國信貸，尋日一度搶高至1.88元，於當日低位1.69元上車，最多賺逾11%。