恒生老員工粱太視如寶

企業管理層近年最「頭痕」嘅係依家啲後生仔打工態度，雖然當中都有出類拔萃之人才，但亦有工作態度差，遇到有少少唔滿意或者比較辛苦嘅工，好輕易就辭工唔做。尋日太子見到一班喺恒生銀行（00011）服務咗三十年嘅員工，同依家一般打工仔年年跳槽真係分別好大。

500人獲長期服務獎

為咗多謝呢班咁忠心及默默耕耘嘅員工，恒生副董事長兼行政總裁梁高美懿專登親自頒獎畀服務咗十年、二十年及三十年嘅優秀員工，梁太加入恒生只有兩年，佢笑住話對住年資三十年嘅同事，自己變身「晚輩」。

數吓手指計算，原來達到呢個服務年期嘅員工，竟然有500位，所有得獎者合共為公司服務超過一萬年，學「柴九」話齋，人生有幾多個十年，佢哋真係貢獻晒青春。

梁太對佢哋真係有讚冇彈，仲向佢哋及佢哋嘅家人表示衷心感謝，盛讚員工係「寶」，希望佢哋貫徹恒生「用心」嘅文化，以「專心、關心、真心」嘅態度，繼續為客戶及身邊同事服務。梁太唔係齋得把口讚，佢代表銀行送出紀念金幣及感謝狀，表揚員工為公司多年來嘅付出。