Fundman睇市：上實城開炒重組概念

踏入一一年，港股一日都未跌過，認真厲害。恒指昨日再升28點，收報23,786點。儘管上升動力減弱，但地產股及滙控（00005）繼續強勢，尋日連本地建築股都炒埋一份，可見資金不單無流出，仲四圍搵股仔去亂炒。

新年唔少大行出來預測全年指數目標與各類經濟數據，筆者突然想起，諾貝爾經濟學獎得獎者Paul Samuelson半個世紀前的金句，話「美國經濟學家成功預測過去五次經濟衰退的其中九次！」他當時諷刺華爾街經濟學家常估常錯。半世紀之後，今日我哋接收更多資訊，也吸收更多似是而非的預測，到底幾多變成事實，看官應該心裏有數。

遠的不提，好似○九年初全世界睇死美國會開始退市，結果點？聯儲局轉以失業率同利率掛鈎，零息變成常規化，美股由○九年首季跑到今日都未有攰嘅迹象。

猜市猜經濟，同年初買風水運程書一樣，睇吓無妨，但信到十足就確係無謂。不過，我哋可以由客觀事實，分析一下今年應該點樣做。現時，一一年恒指市盈率大概12.9倍，在歷史波幅9至21倍的中位數樓下，今年香港通脹極有可能因為內地進口物價攀升，繼續向上；美國就業市場未有起色，美元超低息期可能維持多一年甚至更長時間，香港零息局面短期不會改變，上半年中國要壓抑通脹，可能要稍為犧牲一下經濟增長，GDP或者低過過去一年，可是交出增長8至9%問題應該唔大。

港股下跌風險有限

通脹一向係股市嘅好朋友，加埋祖國經濟增長同美元超低息口配合，香港資產價格及股市要跌亦唔易，即使唔訂目標，相信大市向上機會，要遠比下跌風險大。

老友唔知點解舊事重提，講起九七年紅籌熱，高PE批股注低PE資產，當時光大系玩得出神入化，但這種把戲，感覺已經N年無在股市中出現過，至少規模夠大的，唔多覺眼。去年上實（00363）睇中中新地產，由大股東手上以每股約2.32元接手，並改名上實城市開發（00563），唔少對炒注資概念樂此不疲的股民興奮莫名，股價亦由2.8元起步，一度炒到4.4元，聖誕前後幾乎回到原點，近幾日又再見炒作，由低位反彈兩成一，報3.43元。

業務重疊情況明顯

由彭博資訊顯示，物業發展部分佔上實○九年度收入33.3%，資產59.2%，負債88.9%，其重要性，比另外兩大主營項目︰基建及消費品投資有過之而無不及。再睇上實城開，三大核心業務：物業發展、物業投資及酒店經營，兩間公司之間有明顯業務重疊的情況，點解上實仲要買上實城開？問十個貼市的股民，恐怕過半的答案是：買嚟炒！

改名後，不難令人聯想兩者重組可能性極大，上實城開接收所有物業投資資產，讓上實的基建及消費投資資產，有更明確的區分。不過，同十多年前紅籌注資熱有一點大分別，是上實本身亦係上市公司，資產轉讓定價的透明度一定較高，上實城開未必有好大着數，唯一即時想到的好處，係有上實撐腰，未來融資成本會低一截。筆者唔反對炒上實城開，但嫌煩唔想去估上實點行呢一步棋，不如留意殘到極的內地地產股，仲容易計數。