Fundman睇市：大家樂 盈利能力冇跌WATT

天氣乍暖還寒，股市亦一樣，恒指尋日再跌478點，報23,214點，短短兩星期，市場由炒美國QE2大印銀紙，變咗驚中國提早進入連環加息周期，恒指由高位24,988點跌到尋日的23,214點，一共跌咗1,774點，技術走勢上，22,880點起步的最後一輪升浪2,108點，已經跌番84%出街，短期升浪已徹底被破壞。

睇番今次，港股主要係跟外圍走，道指前晚再跌178點，收報11,023點，即市低位10,979點已經相當接近50日平均線10,966點，要知九月初炒聯儲局QE2，道指突破50日線之後扶搖直上，如果掉頭跌穿形勢相當不利。

其實今浪人人睇聯儲局點印銀紙，用直升機撒錢落嚟水浸股市，可是實情係人有人講，美元早在十一月四號開始見底反彈（比港股見頂仲要早四日），美匯指數輾轉已經由75.63低位，升到執筆時的79.16，值得留意，美匯指數六月開始級級落，從未試過連續三日企响50日平均線（現時在78.48）樓上，如果未來兩日都無意思落返去，美元可確認轉勢，QE2斷定炒完，股市有機會由單邊升市，變番做今年首三季的大型上落市。

氣氛差成咁，都無特別心水股想講，唯獨早前畀罷食活動搞到周身蟻的大家樂（00341），就引起筆者一定興趣。

講到是次風波，最終以大家樂收回成命，唔扣飯鐘錢而告一段落。不過筆者並非想長篇大論咁講企業良心，只係有興趣睇吓，到底最低工資落實，係咪真係對大型餐飲公司影響咁大。

最低工資影響有限

的確，快餐業屬於利錢極低的生意，只求薄利多銷，睇番一○年三月底止年度，大家樂做咗48.8億元生意，賺5.13億元，換句話，每幫襯10蚊，大約淨賺閣下1蚊左右。再睇，去年僱員福利開支11.86億元，相於當總收入的24.2%，當中工資及補貼大約是10.87億元，以15,000個員工計，平均每人每月只係6,038元，除三十日及每日八小時，等於大約時薪25.1元。

筆者手上無大家樂員工低於或高於28元法定最低工資的比例，粗略計，就直接將平均數拉高到28元，即係薪酬成本升11.5%，等於一年1.25億，或者總銷售額的2.56%，只要將平均30多元的每單消費，提高1元，應足夠抵銷最低工資影響，唯獨其他輸港食物價格漲幅，影響可能更大，以去年食材佔總收入比例為例，便高達31.1%。

大行估值不跌反升

由歷史數字，股民應該毋須急於將大家樂的成本轉嫁能力，作過分悲觀的預測，回顧過去十年，集團毛利率由14.5至15.5%逐步攀升，一○年去到17.04%的新高，要知每1%的改善，等於4億多毛利，這程度的改善，在大型餐飲股中並不常見。而且，大家樂員工效率近五年也見持續改善，包括每名員工的營業額及收益貢獻，由○六年起拾級向上，這令史提芬相信，提高平均薪酬，對大家樂來說只會帶來短暫陣痛。

傳統上，弱市中高防守性的餐飲股表現特別醒神，證券行預測一一年大家樂賺5.64億元或者每股99.3仙，相當於21.1倍市盈率，筆者都覺得意外，事關其商譽在罷食事件中受到一定程度的損害，加上食品及薪酬趨升的預期，但大行估值反而比歷史平均的17.6倍高出近兩成。或許看好大家樂的，是基於通脹預期下，相信其食品加價幅度會跑贏大市。個人認為20至21元，會係唔錯的中長線入貨區域。