祖兒阿詩No Show明剃眼眉

香港電台早前在取消「四台聯頒音樂大獎」上投支持一票，觸發英皇及東亞宣布「拒絕再玩」，昨日英皇及東亞以「冷待姿態」派二、三線歌手出席《十大中文金曲》記者會，更峰迴路轉的是港台竟宣布重設5項「傳媒大獎」，似想修補與唱片公司的關係，卻弄巧成拙惹人反感！

港台《第三十三屆十大中文金曲》昨日舉行揭幕記者會，惟場面大而星光暗淡，連原本出席名單上有的容祖兒及古巨基都缺席，現場只有謝安琪、張敬軒、G.E.M.、孫耀威、鄧麗欣及樂壇新人。英皇只派出陳偉霆、鍾舒漫及洪卓立出席，而東亞亦只有衞蘭、王菀之及樂瞳做代表，相比上月《叱咤頒獎禮》記者會就明顯星光遜色！當時祖兒、楊千嬅及何韻詩均悉心打扮，基仔更撐着拐杖出現！

據知，英皇與東亞予以冷待，全因港台贊成取消「四台聯頒」，故趁今次記者會還以顏色！對於祖兒與基仔甩底，英皇集團行政總裁吳雨說：「祖兒為咗綵排星期五嘅演唱會，之前答應港台會盡量出席，不過最後都係嚟唔到！廣州亞運火炬手原本都有祖兒，但祖兒都只出席到開幕，咁有意義嘅火炬手都冇去，就證明佢好緊張個演唱會啦！」至於基仔亦冇到，吳雨則說：「佢新店開張遲咗拜神，如果嚟記者會會遲大到，所以先唔到！（剃港台眼眉？）唔好對號入座，如果係就全體唔去啦！我哋好支持港台！」而東亞發言人梁小姐表示，千嬅身在外地工作而缺席。

新城朱明銳：巧立名目！

不過最令人意外是，昨日港台竟宣布重設「傳媒大獎」，包括男、女歌手、歌曲、作曲及作詞5獎，大會總監馮偉棠說：「四台聯頒前，港台94年已經有『傳媒大獎』！（怕唔怕畀人話取巧？）唔會！呢個獎係我哋有先，而且方式唔同，係由各大電子傳媒、收費電視、報章、雜誌、無綫、亞視等超過30個機構嚟投票。（有冇機構拒絕參加？）因為本月27號先開始投票，暫時就未有！」對於港台突設「傳媒大獎」，吳雨表示有待了解：「真係百思不得其解，佢哋話取消又搞番！」東亞唱片亦表示不清楚。而新城知訊台台長朱明銳則憤憤不平說：「佢哋冇請我，就算請我都唔參加！問題係港台唔係想做乜就做乜，唔該唔好巧立名目！港台唔係商業化電台，唔該做番一啲對香港聽眾同樂壇有意義嘅事，唔該啲人唔好做咁多無謂嘢，去滿足自己私欲同權利！」商台對外事務部則表示未收到通知，暫時拒作回應。無綫高層何麗全則說：「未聽過，開完會先覆大家！」