Fundman睇市：友邦 逼超級大戶贏錢

上周五，華爾街股市出奇咁平靜，道指升4點，收報11,118點，紐交所成交是五日以來最低。美國第三季GDP升2%，同市場預期一樣，芝加哥採購經理指數十月份微升至60.6，好過預期的58，可是，十月消費信心指數由67.9微跌至67.7，數據好壞參半，亦無改變市場對下周三聯儲局趁議息後推出QE2的期望。

普遍見到街外經濟師近期調整對QE2的預期，由一次過4,000億至2萬億美元回購國債計劃，變成無定額無上限，分段進行的量化寬鬆措施，這種做法好處是等市場對印銀紙撒落街的期望，長炒長有！

姑勿論結果點，上星期新興市場股市已經開始回吐，經過九月及十月的急升，唔少基金經理開始鳴金收兵，鎖定利潤，唔想在QE2曝光前夕繼續豪賭。唯獨前大摩名嘴、今日自立門戶的對沖基金經理碧斯（Barton Biggs），繼續其好友本色，上周五接受訪問時預期，一旦本周聯儲局推動新一波量化寬鬆，股市會大出市場意料之外，再急升一成，佢老人家最睇好科技股及製藥類股份。不過，碧斯自從離開大摩，極度睇好到今日都無起色的日本股市，因而威望大減，今次力排眾議，是翻身之作？抑或真知灼見？幾日後有答案。

成日話香港貧富懸殊，有錢人搵錢好似執豆一樣，打工一族捱生捱死為廿五蚊時薪，的確所言甚是，上周五睇見隻友邦（01299），筆者真係無嘢好講，簡直係逼有錢入孖展的大戶贏錢一樣。

頭槌飛狂賺九千萬

先係IPO部分居然得兩張大飛，各申請2.92億股獲批2,670萬股（中標比率9.12%），110萬元利息狂賺9,000萬元咁神奇，皆因就算史提芬明知配售比例，都無辦法搵到5.7億元出嚟畀一成按金，這些錢，不是我輩可以賺到的。

按照正常新股上市，通常愈大的認購申請，獲配比例會較少，認購愈少，中標比例一般會較高，情況就如認1手通常做到百分百成功，人人有份，與希望等公司上市初期、建立更大股東基礎有關。

超額倍數唔算，但1手200股申請，不單止唔係人人有份，中籤率得六成。更奇怪嘅係，蚊型大戶同超級大戶的待遇一樣，申請30萬股（一成即59萬元按金，相信今日唔少活躍炒家都負擔得起）到認最多2.92億股的「乙組認購人」，一律獲配9.12%，兩個超級大戶認購數目，本來係認30萬股的蚊型大戶的969倍 ，這樣「一視同仁」的獲配比率，都算罕見，簡言之，係逼超級大戶贏錢。

進身藍籌又有得炒

講句公道話，史提芬估計一切一切，都係包銷商精心策劃，避免等蚊型到中型大戶因為獲配超過一成，要追補孖展或者首日立即被迫沽貨，增加沽壓。另外，筆者聽聞配售部分不少基金埋怨獲配出乎意料的少，結果被迫於從暗盤及首日市場上補貨，令上周五股價表現遠超市場預期。

以股論股，以友邦一一年1.55倍的內含值（P/EV），雖然可順便炒埋亞洲貨幣升值，變相賭坡紙及泰銖升值（兩地去年佔純利貢獻五成一），但都係唔算好平，唯獨十一月加入富時指數，估計MSCI唔使幾耐都會入選，加埋依家市值2,776億元，經已超過中銀香港（02388）的2,569億元，下次恒指服務公司開會，又有得炒，似乎手上有貨的，可以稍為等多陣，唔使心急，年底前見25至26蚊的機會唔細。