馬迷中Q化水：邊個賠番錢畀我？

【本報訊】網上投注系統突然「壞腦」氣煞馬迷，由網上討論區到投注站都怨氣沖天，有醒目馬迷在昨午一時發現網上投注系統「虧虧哋」後，即改用電話投注，雖然未有錯失投注心水機會，卻埋怨用多一倍時間。網上討論區怒火更烈，有馬迷到第五場賽事仍未能成功登入，在討論區留言質問馬會：「係咪要跑完十場先買到馬啊？」網上留言夾雜粗言穢語，亦有馬迷投訴網上投注系統「愈升級愈失敗」。

批評時有故障

從事建築業的盧先生昨日受馬會電腦系統故障影響未能於網上投注，即使改用電話投注成功，但他後來路過投注站時仍滿腹不滿：「十二點仲用到（網上投注），但到下午一點幾網頁就顯示系統繁忙，轉用電話投注都幾麻煩，用多咗成一倍時間。」盧稱，幾乎每天均會使用網上系統投注賽馬或足球賽事，形容昨午如此嚴重的電腦故障較為罕見，希望馬會能盡快改善。

另一馬迷楊先生亦是網上投注常客，可惜須經常忍受網上投注系統短暫故障之苦。他說：「有時想朝早投注但係用唔到，仲要等成幾個鐘先用得番。馬會一年賺咁多錢，應該做好啲電腦系統啦。」不少馬迷認為今次事故與新網上投注方法有關，埋怨新系統添煩添亂。聲稱若能登入便命中昨午第二場賽事連贏位的網民cwai說：「個系統愈整愈麻煩，愈升級愈失敗，邊個賠番二百幾蚊畀我啊？」