人民幣急升一日，尋日偏軟，執筆時回到6.8算樓上，見6.8130，跌番前日升幅一半。A股尋日亦出現高位整固，港股跌93點，報20,819點，對比前日超過600點進帳，算係回得少，雖然未能創出連升十日紀錄，但或多或少見到基金補貨活動仲未完。
航運股近半年鮮有研究，也沒有推薦畀看官，事關不明朗因素實在唔少，美國貿易儘管有好轉，可惜「歐豬」轉頭又出事，反映乾散貨運費的波羅的海指數，好似坐過山車一樣，由金融海嘯前高位11,793點，插到○八年低位見過663點，本以為○九年全球央行印銀紙加埋美國經濟好番會有利好幫助，點知去年底彈上4,600點後又再跌過，現時得番2,600點，話衰未至於最衰，但話好亦唔見得係好。
生產集裝箱的勝獅貨櫃（00716）尋日出盈喜，股價升0.08元，報1.53元。盈喜通告中表示，全球貿易活動由去年底開始改善，集裝箱需求向上，銷售價格回升，加上內部管理全面加強成本控制，中期業績可望虧轉盈咁話。
供股接貨贏到開巷
去年三月航運業低潮，勝獅宣布供股，筆者當時認為折讓太大，小股東為免被攤薄權益應盡量參與，估唔到短短半年，股價已由0.3元水平去番1.7元，有供股的贏到開巷，但亦因為股價比行業復甦走得太前（貨裝箱定單通常比航運需求復甦更滯後），去年底筆者已認為1.2元樓下才抵博。
盈喜之後值唔值得上車，是一大難題，儘管削減固定成本輕身上路，但勝獅貨箱生產定單回升幅度有幾大？外人唔易估，○七年高峰期一年可以有15.46億美元，○九年淡市得番2.74億美元，五分之一唔夠，分析員暫時估全年有10.66億美元，去番高峰期七成，可是已比○五年及○六年高，歐洲貿易萎縮下係咪咁樂觀？見仁見智。市帳率1.3倍，比十年歷史平均值1.52倍（高低位是極端的0.11至3.21倍），折讓一成五。無疑，周期起伏的勝獅，唔係一隻穩健的長揸股，但撇開盈利有待恢復的問題，假如相信航運業已進入復甦周期，現價買入勝獅，應該仲有水位。