對比前日插水超過400點嘅港股來說，尋日只能用「反彈乏力」四個字去形容，中段港股係威係勢，升穿10日線21,175點，去到21,211點，可惜食晏後已無以為繼，最後得54點進帳，收報20,987點，藍籌業績消化得七七八八，中資銀行第四季業績應該不會有太大的意外，港股焦點又落番响外圍市況身上，筆者認為當中又以美匯轉強的影響最大。

港股受制美匯轉強

唔信？不妨睇過去幾個月美電同港股的反向走勢，舊年年底銀行體系仲係水浸，結餘超過4,000億元時，美電長期企在7.75的強方兌換保證水平，直到去年十二月三日，美電靜靜起革命，由7.7500升到今年一月廿七日見7.7768，期間港股由22,553點碌落20,033點，跌掉2,520點，跌幅超過一成，之後美電稍為回順，到三月十二日見7.7570，恒指又彈番上21,209點，升1,176點。美電升跌，唔多唔少反映熱錢流向，故對港股的影響力是非常直接。美匯指數跟住係升係跌，對後市相信十分關鍵。

內地超市股物美商業（08277）出○九年度成績表，賺4.38億元，倒退10.7%，儘管管理層隨即解畫，話剔除股權置換的一次性影響後，實質增長有21.2%，但股價依然低見13.5元的一個半月新低，最後跌7.2%，報13.7元。

內地零售股估值高

以現價計，物美往績市盈率33.4倍，絕非便宜，但睇番內地零售股，其實偏高情況嚴重，像聯華（00980）市盈率達36.6倍、百盛（03368）36.7倍、金鷹（03308）更達40.6倍。高昂溢價，顯示市場對內地零售股的寡頭壟斷，信心十足，但亦形成業績可以出現誤差的空間唔多。

○四至○八年，物美盈利增長率介乎34至74%，即使撇開特殊項目，21.2%依然是一個頗令人失望的增長幅度，有鑑於此，管理層今次特別強調未來透過收購加快發展的可能，亦計劃走出根據地北京、天津和浙江，進軍其他市場，以目前集團手持近7億淨現金，應該足夠應付。唯一令筆者卻步的，始終是估值過高的問題。

睇番過去三年，物美市盈率介乎十三至三十七倍，可見零售股防守性雖然強，但股價仍受股市周期所影響，故有心入貨者唔需急於一時，中間落墨，見二十五倍PE即12.7元左右，筆者才會好好考慮。