本文重點
繼山貓後，NBA西岸弱旅勇士最近亦宣布賣盤，仲請公司搵買家。雖然球隊前景混亂，不過球員一於少理，尋日仲同太陽大打「快樂籃球」合演得分大戰，難得勇士最後主場僅輸131:133，可謂雖敗猶榮！
同太陽鬥攻僅輸2分
由於勇士近年成績低迷，仲要响出面欠人一身債，勇士現任班主高漢近日終於頂唔住宣布賣盤，仲搵咗GSP公司全權代理球隊出售事務，兼任出售過程中獨家財務顧問。據講軟件界巨頭甲骨文公司CEO艾利臣對收購勇士好有興趣，消息指一旦成功，仲會搵湖人傳奇名將謝利韋斯出任營運主管，另外有傳魔術莊遜亦係收購勇士熱門之一。
雖然易手一事十畫都未有一撇，不過勇士一班球員認真敬業，尋日主場仲同太陽鬥攻，有6位球員得分達雙位數，可惜對方嘅史杜迪米亞實在太弗，個人狂轟37分，最終勇士以2分之差僅敗，但可以話一啲都唔失禮，聽日主場再撼力爭季後賽資格嘅灰熊，隨時又再大手交易，大盤絕對值得再追！
