鍾嘉欣和童星楊鎧凝等昨日到九龍灣出席活動，嘉欣透露正與黃宗澤（Bosco）忙於拍攝無綫劇集《警犬巴打》，她大爆被狗狗「玩謝」：「我未養過大狗，要畀佢咬同錫，仲要抱住佢嚟碌！」又笑言於劇中會拒絕身上有「狗除」的Bosco獻吻：「Bosco本身養狗就會有『狗除』，狗狗唔會驚佢。（嫌佢有『狗除』所以唔拍咀戲？）冇咩咀戲，劇中有次佢差啲錫到我，我就推佢落地！（咁唔怕傳緋聞？）傳我同狗狗Friend就好！」

嘉欣BB與「Anna公主」打扮的楊鎧凝（右）出席活動，大人細路一樣Cute！

有指胡杏兒及萬綺雯等約滿無綫後不再續約，嘉欣稱距離續約仍有一段時間，與無綫合作愉快。問會否提前傾續約？她表示不拘泥於合作方式，但希望多見曾合作的拍檔。問會否對藝人離巢感可惜？她認為藝人與公司之間最緊要保持良好關係。