陳豪騙婚呃鍾嘉欣封賤男

進入結局周的無綫劇集《點解阿Sir係阿Sir》可謂衰收尾，情節惹來網友圍插，直指騙「Miss Koo」鍾嘉欣感情的「羅Sir」陳豪為賤男！

鍾嘉欣在《點解阿Sir係阿Sir》中飾演Miss Koo，因被陳豪飾演的羅Sir騙婚，引起網友極大回響，既封陳豪為賤男，又聲言要「剪」他，有網友更力撐嘉欣比《花花世界花家姐》中演智障的佘詩曼更有力問鼎視后！

對此，嘉欣接受電話訪問時表示受寵若驚：「多謝網友支持！希望大家唔好咁激動！只係電視劇嚟啫！梗有好人、壞人，陳豪角色係臥底，佢都有苦衷。（網友撐你砌低阿佘攞視后？）唔好咁講，我都有睇阿佘《花家姐》第一集，佢演繹迷路嗰段令人好感動，台慶頒獎禮距離依家仲有好大段日子，其實我幾鍾意自己《囧探查過界》嘅模角色，同埋《阿Sir》嘅Miss Koo角色，如果是但一個攞到最受歡迎角色，我已經好開心。」

《花家姐》繼續捱轟

此外，廣管局接獲三宗投訴，指上周播出的《點解阿Sir係阿Sir》破壞警隊形象及教壞小朋友，另有兩宗投訴指《花花世界花家姐》內容暴力、意識不良，而於上周六播出的《萬眾同心公益金》亦接獲三宗投訴，主要批評舞衣太暴露。