雖然未到季後賽，不過NBA幾支球隊都已經進入作戰狀態，塞爾特人對騎士，以及魔術對灰熊，更差啲打出真火！雖然騎士最後輸波，但因湖人喺另邊廂亦不敵馬刺，令騎士喺季後賽將取得絕對性主場優勢。

先講騎士對塞爾特人，2支東岸死敵尋日正面交鋒，激烈程度拍得住季後賽，全場合共出現6次「T-Foul」（技術犯規），其中騎士教練米克布朗更因為衝入球場同球證理論，連食2次「T-Foul」被逐。騎士主將勒邦占士亦先後同「綠軍」嘅東尼阿倫同加納特起爭執。

大帝自爆勁憎塞爾特人

雖然騎士憑勒邦占士喺第4節射入全場42分中嘅20分，帶領一度落後22分嘅騎士反超前，但塞爾特人最後憑雷阿倫射入今季新高33分，主場以117:113擊敗騎士。占士賽後承認佢同隊友都極之憎塞爾特人，所以打得咁激。好彩湖人尋日不敵馬刺，騎士喺常規賽勝仗肯定比湖人多，若兩隊嚟緊喺總決賽相遇，騎士將比湖人打多一場主場。

放大圖片	放大圖片	放大圖片

魔術班尼斯死撐係誤會

同日魔術對灰熊仲激，全場唔止出現6次「T-Foul」，兩隊仲險爆圍毆。事緣魔術嘅班尼斯喺第3節上籃時被灰熊嘅泰亞拔撞跌，點知球證反吹班尼斯進攻犯規，引發10人推撞，最終班尼斯被逐。賽後班尼斯解釋成件事係一場誤會，不過點都好，魔術最後憑卡特取得26分同6次助攻，主場以107:92擊敗灰熊。

聽朝又有9場常規賽，其中公牛主場對公鹿，公牛爭季後賽入場券不容有失，受讓2.5分，撐下盤。