（設計圖片及對白）
建仔喺一二年立法會選舉，由原本十個議席增加至十三席，其中新界西嘅配票策略成功，由「譚Sir」譚耀宗、梁志祥同Ben陳恒鑌領軍嘅三張名單全部當選。最近有傳政府打算微調明年立法會選舉議席數目，港島區由七席減至六席，九龍西就由五席增至六席，據聞建仔諗住喺新界西同九龍西博到盡。不過，佢哋最新嘅選舉部署能否成功都好難講，仲分分鐘連累其他建制派添！
新界西首次分拆三張名單全部當選，除咗建仔配票成功，亦有人歸咎於泛民主派部署失當，唔少人都認為建仔算好彩。不過，事隔四年，政治氣氛固然唔同咗，譚Sir早前亦表明會退下火線，建仔想喺下屆選舉保三席都唔係咁容易。聽聞該黨最新嘅選舉部署，仍然係今屆嗰三個，但由三條隊縮減至兩條隊，一條隊改由阿Ben排第一，其次係譚Sir，另外梁志祥一條隊。譚Sir向來吸票最勁，如果成績理想，佢都會做多一屆先退喎。
阿Ann推新人 不利梁美芬
但佢哋嘅諗法可能太理想，事關經過佔領行動後，無論建制派或泛民都流失咗支持者，譚Sir喺力保阿Ben同自己嘅議席下，可能吸票吸過龍，可能連累同屬新界西嘅工聯會麥美娟、新民黨田北辰等建制派。好似今屆公文袋余若薇同郭家麒合組名單挑戰新界西，前者排喺名單第二，當時已預計到呢個部署會增加佢重返立法會嘅難度，結果一如所料，落敗收場。
九龍西方面，建仔蔣麗芸（阿Ann）日前已率先表態，如該選區增議席嘅消息屬實，會積極考慮派黨內新人競逐，佢自己就排名單第一。呢個安排對建仔嚟講係合理，仲可以提攜黨內年輕一輩上位，但咁做對同屬九龍西嘅梁美芬就非常不利，而一直希望殺入該區嘅工聯會更加無望。雖然建仔放風推出新選舉部署，但一有改動，就難免觸及其他建制派嘅利益板塊，睇嚟未來淨係爭出選已好戲連場。
第一手消息請下載on.cc東網
