張炳良出席活動，又引用多一次五歲小朋友。
五歲小朋友近期熱爆政圈同互聯網，事緣《施政報告》嘅九十段引述咗一段咁嘅說話：「我長大後住哪裏？」有網民好心水清咁統計，政府官員已經引述呢個例子幾次喇，尋日，運輸及房屋局局長張炳良出席一個活動同青少年見面，佢又引用多一次，喺講開場白時，話嗰班青年比五歲小朋友大好多，居住問題應該比五歲小朋友更迫切喎。再一次攞呢個五歲小童過橋。
主管房屋嘅張炳良尋日大講樓價問題，佢話，自己深深明白青年置業嘅苦況，依家香港嘅樓價，即使兩名專業人士月入六、七萬元，都未必負擔得到，所以青年置業壓力大，佢深深明白。不過，佢都引其他地方為例安慰本地青年，話樓價上升呢個現象唔只喺香港發生，倫敦同悉尼兩個城市嘅樓價亦上升咗一成四，可見樓價狂飆情況可以話係橫跨歐亞，佢又叮囑青年人，唔好急於做置業決定，凡事要有獨立及慎重思考。
第一手消息請下載on.cc東網
