工聯會提早開席同公公婆婆食團年飯，黃國健（右）希望羊年香港「馴番啲」。
工聯會尋晚擺足四十二圍，宴請五百幾個獨居公公婆婆提早食團年飯，更請到特首梁振英（CY）同勞工及福利局局長張建宗（小肥張）陪食。
黃國健致詞獲讚好
同樣有份陪食嘅黃國健就負責致詞，佢語帶雙關話，希望香港踏入羊年都「馴番啲」，全場拍掌讚好，究竟黃國健話乜嘢馴啲？係「拉布」議員定係另有其人呢？
酒樓裝修逼改地方
今年餐團年飯改咗地方，唔再選址立法會議員陳婉嫻（嫻姐）嘅地頭黃大仙，而轉場九龍灣一個商場，原來係因為原本位於黃大仙酒樓所在商場嘅舖位大裝修。
據講，該間黃大仙酒樓所處嘅商場係領匯嘅，酒樓表示，已經租咗上址十年，做區內街坊生意，本來都賺得唔多，好驚第日租金太高，希望領匯手下留情喎，咁樣嘅話，參加活動嘅公公婆婆明年就唔使咁頻撲。
第一手消息請下載on.cc東網
