吳向東
滬港通終於開車，但唔係個個都坐到順風車，好似華潤系孖寶——華潤置地同埋華潤創業咁，就非常黑仔，分別受到主席辭職同盈警嘅負面消息拖累，唔單只上唔到車，股價雙雙下跌，潤地股價最多跌逾7%，收市跌4.1%，華創收市跌5.14%。
潤地尋日發通告，執董兼主席吳向東因為個人理由辭任公司董事會主席職務，啱啱過咗嘅星期日生效；而執董唐勇就會做董事會副主席，同埋主持董事會工作，但就未有交代新主席嘅人選。
上任僅短短十七個月
事實上，吳向東出任潤地主席嘅時間並唔長，由前主席王印手上接過主席職位，只係短短十七個月嘅時間，咁快唔做，令人有啲意外！
而同系嘅華創亦都好「陰功豬」，畀買咗冇耐嘅Tesco拖累要發盈警，咁嘅表現，投行梗係冇面畀，出埋報告「踩多腳」。咁嘅形勢，投資者梗係放棄孖寶買其他嘢，有乜辦法唔畀滬港通呢班車，輾到周身傷痕。
第一手消息請下載on.cc東網
