城中鏡：利標掛牌 陣容大晒冷
利豐分拆利標品牌講咗咁耐，尋日終於順利上市，雖然利標首日收市價麻麻，但上市儀式陣容贏晒。利標副主席兼行政總裁樂裕民（Bruce Rockowitz）獲任命為利標「揸fit人」，拖住愛妻兼樂壇天后Coco李玟最早到港交所現場，以主人家身份招呼其他董事，包括利標獨立非執董盛智文。最驚喜嘅係，連馮氏一家都幾乎「晒冷」現身。
樂壇天后李玟（右五）全程笑容滿面陪伴樂裕民（右四），馮氏家族兩兄弟馮國經（右三）同馮國綸伉儷（左四及五）亦現身撐場。
馮氏家族兩兄弟馮國經同馮國綸孖住出現唔在講，企喺樂裕民左右兩邊在台上任影之餘，一家大細喺台下撐場，馮國經之子兼新任利豐CEO Spencer馮裕鈞、馮國經女兒馮詠儀，甚至馮國綸太太等重量級家庭成員均準時參與上市儀式。
樂裕民愛妻Coco就攞手機幫老公影相，幸福洋溢。Spencer就內斂好多，尋日係佢榮升後首次公開亮相，但佢深明主客之道，只係同記者換咗新卡片，接棒感言就大賣關子僅輕輕講句日後再分享。唔知佢等到利豐中期業績再講嘅話，又可唔可能分散大家對佢接掌利豐CEO後首份成績表的注意力呢？
