政壇：EQ檢舉長毛着短褲
雖然立會前主席范徐麗泰當年曾裁決着T恤並非唔莊重，但着短褲就未有裁決過。話說議員「長毛」梁國雄尋日如常着T恤同短褲出席立會會議，點知議員EQ葛珮帆下午玩突襲，檢舉長毛衣着唔莊重。
梁國雄
EQ話一直都冇留意長毛着乜嘢褲，但尋日朝早有市民向佢投訴，話睇電視見到長毛着短褲，感覺唔夠莊重，「有乜理由（着短褲），下次着泳褲，唔着褲都得？」所以向主席曾鈺成提出規程問題。雖然主席叫長毛換番長褲，但長毛唔肯。搞咗十幾分鐘，長毛最終屈服去換褲，直言係忍辱負重。長毛話立會唔應該歧視着短褲嘅人，好多港人夏天都着緊短褲，聲言「人民着嘅衣服係最莊重」，又指議事規則大過天嘅年代已經過去，女議員可以露膝化妝，男議員都可以，應該推廣平權咁話，佢聲言會提出司法覆核。
長毛返會議廳後，突又提出規程問題，話覺得梁美芬衣着唔係好莊重，話周時見到啲女性打扮得妖冶，佢都覺得唔莊重。梁美芬一聽即時要求長毛收回「妖冶」兩字，認為係不合理指摘。不過，主席就裁決話，並冇聽過長毛指在場議員「妖冶」，所以冇事。
