政壇：譚志源開騷連斷兩掃帚

被指「騷」味濃嘅「全城清潔運動」昨踏入第二日，五位局長繼續接力落區，幾位局長吸取咗先頭部隊被揶揄表演好hea、同掃假垃圾嘅教訓，尋日落場好似格外出力，政制及內地事務局局長譚志源（Raymond）更喺短短幾分鐘表演時間內，極速掃斷兩把掃帚，Raymond負責清潔深水埗保安道街市，一到埗佢就拎起掃帚不留情咁猛掃，結果掃帚「卡」喺馬路邊嘅欄杆，跟住又大力得滯連斷兩把掃帚。投入過度又係蝦碌，Raymond惟有阿Ｑ補鑊，力撐自己太落力，想剷走地下嘅香口膠所致。

其他演出嘅仲有保安局局長黎棟國、環境局局長黃錦星、勞工及福利局局長張建宗等。黎棟國獲安排到黃大仙雙鳳街街市洗太平地，街市方面特登預留幾張長櫈，方便街坊坐低睇騷，認真細心。

黎棟國到場後亦冇令街坊失望，將原本已經打掃得好乾淨嘅街市入口拖到立立令。不過，張建宗下晝落區就好可憐，被到場示威嘅碼頭工人騎劫咗成個表演。