政壇：議政離題被寸 陳克勤出醜

議政質素係從政者表現評核嘅一個要點，可惜，市面林林總總嘅調查如出席率、質詢率等都無法概括反映到議員嘅議政質素。相對今屆二十幾個新丁，民建聯嘅陳克勤已經算係舊人，不過，尋日喺立法會會議中，佢都出咗醜，政府帳目委員會尋日就學前教育學券計劃審計報告進行公開聆訊，陳離題講家教會，結果畀教育局副秘書長葉曾翠卿毫不客氣咁回敬一拳，既暗寸克勤仔離題，又間接話佢唔做功課兼缺乏常識。

早前發表嘅審計報告揭露，教育局推行嘅學前教育學券計劃漏洞多多，部分幼稚園疑勁收生日會、畢業禮等雜費，更撥作「其他營運收入」企圖掩人耳目，尋日有議員質疑教育局欠缺監管，克勤仔都加把嘴，但佢似乎唔太熟幼稚園「雜費」為何物：「幼稚園家教會係幼稚園收費嘅另一途徑，例如家教會搞好多自費活動，呢啲有無規管呢？」

吳克儉懵盛盛坐喺度

之但係家教會活動中小學、幼稚園都有，亦唔算得上係雜費噃。呢個時候葉曾翠卿立即反駁：「家教會活動唔單止係幼稚園有，連中小學都有」跟住仲好似幾不屑克勤仔嘅言論，輕輕「哼」咗聲再繼續寸：「我哋係咪要微控一間機構嘅所有活動呢﹖中小學仲有舊生會……我哋要諗吓係咪要作咁嘅規管」。

佢發功嘅時候，頂頭上司、有名「吳得掂」嘅教育局局長吳克儉只係靜靜坐喺度隔岸觀火，呢幕下屬越俎代庖、吳得掂懵盛盛真係夠精彩。其實，教育事務關乎學生、家長及學校，因此關心嘅人好多，克勤仔開口夾着脷，皆因唔熟書，結果挑戰官員不成，反而暴露咗自己欠缺斤両同議政質素。