政壇：政商定格：陳帆慧眼睇中喇沙師弟

機電工程署署長陳帆尋日現身香港社會服務聯會（社聯）有份主辦嘅「傑出第三齡人士選舉」頒獎禮，因為佢係得獎者鄒秉基嘅提名人，鄒五年前以四十九歲之齡從金融業退休，之後投身公益事業，依家亦係工程及醫療義務工作協會主席。今年合共有十二名來自社會唔同階層嘅退休人士獲得表揚，年齡最細嘅正係五十四歲嘅鄒秉基。

提名鄒秉基參賽嘅陳帆話，佢同鄒係喇沙師兄弟，講到師弟未足五十歲就退休，陳帆話，依家港人壽命平均有八十幾歲，如果四十幾歲退休後就有四十幾年冇嘢做，又爆料話鄒退休後先學識游水。至於會否考慮早啲退休做義工，陳帆就笑言自己有家庭負擔喎。