政壇：搞搞政：黃國健剪布幫倒忙

立法會審議財政預算案遭社民連同人民力量攜手炮製「拉布戰」，建制派議員連日批評拉布損害香港利益，尋日，工聯會嘅黃國健（KK）同建仔嘅蔣麗芸（Ann）不約而同搬出規程，批評發言嘅黃毓民同大舊陳偉業，結果同畀立法會主席訓誡一番，黃國健更被主席訓示一句：「你唔係第一次參加會議……」呢句猶如摑一巴嘅說話，顯示建制派議員反擊拉布嘅能力真係唔高，幫唔到手，甚至係幫倒忙！

KK就喺人力陳偉業批評該會榮譽會長鄭耀棠冇幫碼頭工人發聲時，彈起身批評大舊講嘢缺乏事實根據，結果被主席曾鈺成訓斥，話佢唔係第一次參與會議，應該知道議員講嘢並唔係句句都要有事實根據嘅，又話如果佢想挑戰其他議員嘅言論，應該循正當途徑發言。而向來聲大大嘅阿Ann就質疑黃毓民發言內容違反規程，曾鈺成嘅裁定卻係毓民嘅發言同主題有關，阿Ann更被主席嗌佢畀少少耐心聆聽其他議員發言。

拉布戰家吓已變成得四子自說自話，好多議員都慳番時間好過，但佢哋兩個以規程挑戰，反而變相幫手燃燒時間。據了解，拉布四子係咁發言，就算佢哋捱得到下月底，傳聞主席都唔會畀佢哋玩咁耐，必定會履行立法會嘅憲制責任，必要時剪布。