政壇：趙必立申報利益懶懶閒

商務及經濟發展局政治助理陳百里同財經事務及庫務局政治助理趙必立，上月中同時間獲政府委任為政助，陳百里一早已提交利益申報，但趙必立返咗工成個幾月，卻畀人踢爆遲遲未將申報放上網，等到尋日先至乖乖申報。有人懷疑係咪金融出身嘅趙必立太多利益關係所以要時間翻查資料，但無論點講都好，入得官場就預咗做乜都要快，兼且要有高透明度。

講番趙必立嘅利益申報，佢申報同太太共同擁有位於南區嘅自住單位，本身亦係香港趙族宗親總會有限公司董事、聖保羅書院同學會董事、香港牛津劍橋校友會會員、賽馬會會員、智經之友會員等。另外佢亦係香港財經分析師學會會員，睇得出佢未入政府前其實都頗為活躍。至於運輸及房屋局政治助理胡韻珊就簡單得多，上任只有七日就填寫咗利益申報。