政壇：陳甘美華清潔騷做布景板

政府發起嘅「家是香港」運動尋日舉行頭炮活動，高官又再兵分多路，落區大做「全城清潔運動」騷，大埔街市係其中一個焦點。可惜尋日朝早天公不作美，大雨落個不停，喺室內嘅活動仲好啲，戶外嗰啲就真係效果麻麻。負責搞活動嘅民政事務總署署長陳甘美華尋日雖然全程留守大埔街市，不過尋日佢全程好似隨員咁，啲高官戴晒黑色膠手套抹欄杆，或巡街市時，佢都企埋一邊。

高官落區宣傳清潔之外，都準備咗啲口罩、洗手液派發，以此提醒街市商販及市民小心防疫，不過，尋日啲高官去到邊都一大棚人，偏偏街市環境又窄又逼，有啲買餸街坊見到通道受阻，反而批評高官阻住晒。