政壇：政商定格：葉澍堃印度歎巨型薄餅

馬會大董Stephen葉澍堃夫婦早前趁住復活節假期，同佳能香港副總裁鄧慶治、「快勞夾大王」杜振源夫婦、立法會議員梁君彥夫婦等十多位老友，遊印度金三角同新加坡，途經印度首都新德里、泰姬陵所在地阿格拉同「粉紅城市」齋浦爾，騎大象兼尋找隱世美食，玩足五日至返港。

去得印度，又點少得歎當地馳名嘅咖喱呢！佢哋去咗新德里一間酒店內嘅傳統印度餐廳Bukhara，美國前總統克林頓、滾石樂隊靈魂人物Mick Jagger等唔少國際知名人士都係呢度嘅熟客。餐廳嘅招牌菜係手拉薄餅Naan，特別之處係超級巨型，足足有成張枱咁大，要三個人合力先拎得起，叫一塊已經夠晒一行十幾人食，蘸上咖喱同吃，味道非常可口。