君如寸志偉周街播種

曾志偉前晚在會展宴請好友逾700人，娛賓環節卻慘被好友大逼供，志偉先被君如取笑「家族龐大」周街子孫，再被追問：「誰是一生最愛？」令志偉支吾以對，笑爆全場！其後他有感而發，與好友逐一真情對話，更指要與「一生最愛」譚詠麟的骨灰擺埋一齊，全晚既搞笑又感人。

後日60歲生日的曾志偉，前晚獲無綫安排在會展舉行生日派對，宴請圈中好友逾700人，不少中港台紅星紛紛出席，包括成龍、譚詠麟（阿倫）、劉嘉玲與吳君如等，群星拱照！君如與錢嘉樂當晚即席主持娛賓環節《星星同學會》，就壽星公的情史進行大逼供，惹來陣陣笑聲！

首先由君如與嘉樂訪問台上嘉賓，包括志偉、黃秋生、苗僑偉（三哥）、戚美珍（三嫂）及鄭中基等，當中志偉向秋生率先發功，大爆對方曾有一名女友是他認識，秋生即笑說：「唔只一個！」三哥則自爆被志偉帶壞：「細個時都係志偉帶我去玩！」志偉聞言即說：「好彩玩到三嫂就停咗！」期間，君如寸志偉指不知他有多少個兒子及孫兒，笑他「家族龐大」周街子孫是因他到處留情，志偉聞言反擊：「係呀！陳可辛都係我收養，因為娶咗你先決裂，家族唔想有啲咁雜嘅女仔。」志偉又搞笑問：「覺唔覺你個女好似我？」君如即答：「嘩！同你搞唔落！」並問出終極難題：「究竟你一生中最愛係邊個？」即令志偉啞口無言，支吾以對。

難得令志偉面有難色，好友紛紛出口「相助」，林建明說：「咪（最愛）佢自己囉！」其時阿倫正上台，志偉見狀便說：「阿倫就係我一生中最愛！不過，人哋把口好毒，若要人不知，唔好畀倫知！」慘被揶揄口疏的阿倫即時表演「口疏」：「我就好佩服志偉，佢好善心，專收留啲無依無靠、唔着衫嘅女仔！」全場哄堂大笑。席間，志偉突然有感而發：「我哋（同阿倫）一定喺一齊o架啦！將來骨灰都放埋一齊！」他又感謝入行時曾幫助他很多的朋友如洪金寶等。

志偉在台上又逐一與好友吐真情，他坦言過去與汪明荃（阿姐）有不少誤解：「仲話過阿姐同羅家英係狗嘅男女，又試過唔覺意踢到阿姐。」幸最終彼此諒解；他又表示對着鄭裕玲（嘟姐）時不敢遲到及背劇本，嘟姐聞言卻笑說：「咪又係遲到！」志偉又讚劉嘉玲是女人中的女人兼夠義氣，嘉玲則讚志偉是羅漢有佛性；曾與志偉傳不和的梁漢文指志偉曾希望他拎最受歡迎男歌手獎，兩人台上亦有互抱。

一輪真情流露後，志偉在台上敬酒時笑言要用真酒不用汽水，期間「眼利」的他見到原為神秘嘉賓的成龍，即捉對方上台：「你（成龍）唔好走人，唔係下年唔同你搞大壽！」最後成龍、阿倫、陳百祥（阿叻）及孫楠等合唱《朋友》。據工作人員透露，原本的拍賣環節因超時而取消，但生日派對愈夜愈精彩，包括志偉的仔女曾寶儀與曾國祥上台致謝，而志偉與同日生日的黃杏秀切蛋糕後，眾人轉場繼續慶祝！

全家夾計免「貓」樣曝光

阿倫與阿叻率先到場，阿倫揚言要灌醉志偉：「志偉下場就係得一個，『醉』有應得！」阿叻亦自言不會飲醉。眾人狂歡至凌晨三時許，阿倫與彭健新一同步出，透露志偉正在場內食消夜：「志偉食咗『五寶散』，係六十大『瀉』！」直到約凌晨四時，現場有兩名保安拿着一張有轆的座椅進場，相信是用來運載飲醉的志偉。最後，曾家成功以調虎離山之計，先由志偉二仔曾國猷指父親正準備在前門離開，再由曾國祥偷偷把志偉由其他出口載走，免得他的「貓」樣曝光！