政壇：政商定格：王師傅教初搵工求充實

成日聽人話北望神州機會處處，好多後生仔都躍躍欲試，但依家喺麥肯錫度做亞太區資深顧問嘅「王師傅」王浵世就認為，中港兩地嘅文化，有唔少嘅差異，好似喺內地就要成日應酬，所以後生仔搵工，不如先喺香港儲多啲經驗，準備好先再上去闖都未遲。

咁大學畢業之後首份工最好係點嘅呢？王師傅就話佢後生嗰時會揀大公司，因為準時出糧，而且大公司好多方面都比較完善，但依家可能時代唔同，搵工最好揀份工作性質可以充實到自己，對將來事業發展有幫助。

其實佢久唔久就會執筆寫吓書，佢依家埋頭寫緊第四本中文書，因之前幾本書target啲冇咁後生嘅朋友，所以嚟緊呢本書會young啲，同內地嘅後生仔探討吓向海外發展嘅嘢喎。幾時有得賣？佢就話要賣個關子嘞！