政壇：政商定格：米老鼠巧遇鍾普洋好啱傾

曾一度公認係前特首「貪曾」曾蔭權爵士嘅愛將，但最終喺維港巨星匯醜聞中被對方離棄、成為「替死鬼」嘅投資推廣署前署長「米老鼠」盧維思，自退休後好少露面。日前見到米老鼠喺中環皇后大道中街頭往金鐘方向行走，見佢神情輕鬆，精神抖擻，睇嚟佢對嗰次事件所帶來嘅憤怒同不快已淡忘喇。

行到中建大廈對開停低，米老鼠企定定等過馬路，而DHL亞太區創辦人Po鍾普洋咁啱喺間英國連鎖零售店出嚟，抽住一大袋戰利品，兩人撞個正着，好似久別重逢嘅老友，好熱情咁打招呼，跟住愈傾愈興起，仲邊行邊傾，講到指手畫腳、七情上面，期間阿Po打開手上嘅購物紙袋，畀米老鼠睇吓自己買咗啲乜。大約同行咗五分鐘之後，兩人先分道揚鑣。