政壇：搞搞政：求脫貪曾污名局長外訪識慳

前特首「貪曾」曾蔭權爵士喺在任時瘋狂外訪，佢任內嘅外訪開支逾一千萬元，視納稅人嘅血汗錢如無物，而佢嘅管治團隊亦有樣學樣。以財經事務及庫務局局長「傻強」陳家強為例，上屆任期外訪咗四十三次，開支達到一百九十四萬元，係局長中嘅「大使之冠」。

立法會議員李慧琼喺審核政府一三至一四年度嘅開支預算提出質詢，睇下傻強係咪照舊咁大使。

據財經局回覆，決策局連同局長辦公室喺一一、一二年度官式外訪同考察等活動嘅實際開支係一百四十九萬元，但一二、一三年度截至二月底共十一個月就只係六十六萬六千元。除非三月份超豪使錢，否則外訪實際開支只係上一年度嘅四成半。佢哋喺本港境內嘅酬酢開支亦有所減少，一二、一三年度實際開支為十萬九千五百元，比對上一個年度嘅十四萬五千元減少兩成半。唔通貪曾卸任後大家都有所收斂？

另外，政制及內地事務局局長譚志源嘅外訪開支，上個財政年度開支八十七萬元，比起高峰期嘅一○、一一年度，少咗六十萬。不過要講清楚嘅係，一○、一一年度適逢世界博覽會，開支較多。